«Հույս ունենք՝ կկարողանանք բացատրել միջազգային գործընկերներին, որ մեղմացումներ պետք է լինեն». Էդմոն Մարուքյան

«Արտակարգ դրությունը, երբ որ դադարի, ըստ քննարկվող օրենքի, երկրով մեկ պետք է հայտարարվի կարանտին: Մեր մտավախությունն այն է, որ այս կարանտինի ուղերձը կլինի ավելի խիստ և անհասկանալի, և սահմանները շարունակաբար չեն բացի: Շատ դժվար է լինելու բացատրել, որ արտակարգ դրությունից ավելի մեղմ ռեժիմի մեջ ենք մտնում, որի անունը կարանտին է: Իհարկե, ավելի մեղմ ռեժիմ է, ավելի քիչ սահմանափակումներ կան, բայց կան խնդիրներ, որոնց մի մասը մինչ այս պահը լուծված չեն»,- բողոքի ակցիա իրականացնող ՌԴ մեկնել ցանկացող քաղաքացիների հետ զրույցում, ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

Պատգամավորը նշեց, որ խնդրի վերաբերյալ ԱԺ-ում ներկայացվել է մեծ փաթեթ, որը 5 ամիս չի քննարկվել. «Ստացվում է՝ ունենք 5 ամիս չքննարկված փաթեթ, բայց 5 րոպե՝ զեկուցելու, ևս 2 րոպե՝ հարց տալու համար»,- ասաց Մարուքյանը:

ԼՀԿ պատգամավորը հույս հայտնեց, որ կկարողանան բացատրել միջազգային գործընկերներին, որ արտակարգ դրությունը հանելուց հետո ՀՀ որոշ քաղաքացիների համար դուրս գալու համար մեղմացումներ պետք է լինեն: