«Սպուտնիկ-Վի» պատվաստանյութի հերթական խմբաքանակը ՀՀ-ում է

«Սպուտնիկ-Վի» պատվաստանյութի հերթական խմբաքանակը Հայաստանում է՝ երկրորդ դեղաչափը ստացողների համար: Այս մասին հայտնում են ՀՀ Առողջապահության նախարարությունից:
Հանրապետությունում համաճարակային լարված իրավիճակի կայունացման նպատակով շարունակվում է պատվաստանյութերի նոր խմբաքանակների ձեռքբերումն ու ներկրումը:
Պայմանավորվածության համաձայն՝ Հայաստանը ձեռք է բերել կորոնավիրուսային հիվանդության (COVID-19) դեմ ռուսական «Սպուտնիկ-Վի» պատվաստանյութի երկրորդ դեղաչափի հերթական խմբաքանակը՝ 15000 անձի համար:
Ներկրված խմբաքանակն այժմ մաքսազերծվում է:
Առաջիկա օրերին երկրորդ դեղաչափին սպասողները կարող են դիմել տարածքային պոլիկլինիկաներ կամ շարժական պատվաստումային կետեր՝ հերթական չափաբաժինը ստանալու: