ՊՇՌ հետազոտություն՝ առանց լիցենզիայի՞. «Փաստ»

«Փաստ» օրաթերթը գրում է․ «Վերջին մի քանի օրերին «Փաստ» թերթը մի քանի ահազանգ է ստացել Լոռու մարզի բնակիչներից՝ կապված կորոնավիրուսային հիվանդության (COVID-19) ախտորոշման ՊՇՌ հետազոտության հետ: Մասնավորաբար, քաղաքացիները թերթի հետ զրույցում նշում էին, որ մինչև հոկտեմբերի 1-ը «Լոռիմեդ» բժշկական կենտրոնում հանձնել են ՊՇՌ տեստ, ստացել են համապատասխան վկայագիրը, սակայն Արմեդ համակարգը QR կոդը չի ճանաչել: Մարդիկ զանգահարել են առողջապահության նախարարության թեժ գիծ, և այնտեղից ասել են, որ «Լոռիմեդ» բժշկական կենտրոնը COVID-19-ի ախտորոշման ՊՇՌ հետազոտության լիցենզիա չունի:

Ըստ թերթի ունեցած տեղեկությունների՝ Վանաձորի մի շարք կազմակերպությունների աշխատակիցներ կազմակերպված ձևով հենց այստեղ են հանձնում ՊՇՌ տեստ: Թերթին դիմած քաղաքացիները նաև ասել են, որ ՊՇՌ հետազոտության համար այս ԲԿ-ին դիմողները շատ են նաև այն պատճառով, որ թեստի արժեքը մյուս կլինիկաների համեմատ էժան է՝ 6000 դրամ: «Լոռիմեդ» բժշկական կենտրոնի տնօրեն Կարեն Ադամյանը «Փաստի» հետ զրույցում ասել է՝ համակարգը QR կոդն իսկապես չի ճանաչել:

«Բայց մի հետաքրքիր բան կա. ես այս պահին մուտքագրում եմ կոդը և այն, կարծես թե, ճանաչում է, կարդում: Իսկ առողջապահության նախարարության հետ մենք որոշակի բան ունենք պարզելու, միասին անպայման կպարզենք»,- նշել է Ադամյանը:

Առավել մանրամասն՝ թերթի այսօրվա համարում։