«Ինչո՞ւ եք դուք կախված Ռուսաստանից, և ոչ՝ հակառակը». Զելենսկին՝ ԵՄ-ին

Ուկրաինայի նախագահ Վլադիմիր Զելենսկին, ելույթ ունենալով ԵՄ արտահերթ գագաթնաժողովում, տեսահոլովակով, կոչ է արել ԵՄ-ին վճռականորեն հարվածել Ռուսաստանին պատժամիջոցներով և վարվել ըստ նրա տնտեսական կշռի։

«Ես ձեզնից ոչ մեկին չեմ մեղադրում, կատարվածի ողջ մեղքը միայն ռուսական պետության վրա է, բայց ես վստահ եմ, որ ձեզնից յուրաքանչյուրի համար ակնհայտ է, որ պատժամիջոցների հարցում առաջընթաց պետք է լիներ այս ագրեսիայի համար, և մենզ դա իսկապես պետք է, և դա մեզ շատ կօգնի: Այնպիսի առաջընթաց, որպեսզի Ռուսաստանը սկսի խաղաղության ձգտել: Եվ միայն սա կարող է լինել մեր ընդհանուր պահանջը՝ խաղաղություն: Մեր տարածքային ամբողջականության, մեր ինքնիշխանության հաշվին փոխզիջումներ չեն կարող լինել»:

Երկուշաբթի և երեքշաբթի ԵՄ արտահերթ գագաթնաժողովում քննարկվում է Ուկրաինայի և Ռուսաստանի նկատմամբ Միության քաղաքականությունը, մասնավորապես՝ պատժամիջոցների վեցերորդ փաթեթը, որը պետք է ներառեր ռուսական նավթի էմբարգոն։

«Շնորհակալ եմ բոլորին, ովքեր առաջ են մղում վեցերորդ փաթեթը, փորձում են այն արդյունավետ դարձնել, սակայն ինչ-ինչ պատճառներով այն դեռ չկա, իսկ ինչո՞ւ եք կախված Ռուսաստանից, նրանց ճնշումներից, ոչ թե հակառակը։ Ինչո՞ւ է Ռուսաստանը դեռ կարողանում օրական գրեթե մեկ միլիարդ եվրո վաստակել էներգառեսուրսների վաճառքից, ինչո՞ւ են ահաբեկչական պետության բանկերը դեռ աշխատում Եվրոպայի և համաշխարհային ֆինանսական համակարգի հետ: Սրանք լուրջ հարցեր են»,- ասել է Ուկրաինայի նախագահը: