«Մատների վրա կարելի է հաշվել այն զինվորականներին, ովքեր կարող են զբաղեցնել ԳՇ պետի պաշտոնը». Տիգրան Աբրահամյան

577

Երեքշաբթի, 07 հունիսի, 2022 թ., 11:24

ԱԺ «Պատիվ ունեմ» խմբակցության պատգամավոր Տիգրան Աբրահամյանի գրառումը. «Հարցին, թե ինչո՞ւ երկրում 3-4 ամիս է Զինված ուժերի գլխավոր շտաբի պետ չի նշանակվում, Պաշտպանության նախարարը զարմացած դեմքով պատասխանում է՝ «Շտաբի պետի պաշտոնակատարն ամբողջությամբ իրականացնում է Շտաբի պետի լիազորությունները, ես ուզում եմ հասկանալ, թե խնդիրն ինչի մեջ է»։

Եթե ամենը նորմալ է, ապա ինչո՞ւ Պաշտպանության նախարարին էլ որպես պաշտոնակատար չնշանակեցին, ԱԽ քարտուղարին, ԱԱԾ պետին, մյուսներին։

Միգուցե դա էլ փոխեք։ Գրեք, որ իմաստ չկա որևէ մեկին նախարար նշանակել ու դրեք պաշտոնակատար, մեկ է, ըստ ձեր տրամաբանության, որևէ տարբերություն չկա։

Բոլոր այն զինվորականները, որոնք ի վիճակի էին ԳՇ պետի պաշտոն զբաղեցնել կամ բանակից հանել են, պայմանագրերը չեն երկարաձգել կամ պարզապես այնպիսի իրավիճակ են ստեղծել, որ իրենց կամքով դուրս գան։

Դեռ չեմ խոսում այն զինվորականների մասին, ովքեր իրենց պատվից ցածր են համարում այս իշխանության հետ առնչվելուց և նրանց ենթակայությամբ պաշտոն զբաղեցնելուց։

Երկրում մեկ ձեռքի մատների վրա կարելի է հաշվել այն զինվորականներին, ովքեր կարող են զբաղեցնել ԳՇ պետի պաշտոնը կամ նշանակվելուց կարճ ժամանակ անց համապատասխանել դրան, սակայն նրանք այս պահին ԶՈՒ շարքերում չեն»։

Աղբյուրը` Տիգրան Աբրահամյան