«Մենք Աղավնոն չենք հանձնում. այդպիսի հարց կարող եք տալ նախկին ղեկավարներին»․ Անդրանիկ Քոչարյան

«Վարչապետը հստակ նշել է, թե ինչպես է լուծվելու Աղավնոյի բնակչության հարցը»,- Ազգային ժողովում լրագրողների հետ ճեպազրույցում ասել է «Քաղաքացիական պայմանագիր» խմբակցության պատգամավոր Անդրանիկ Քոչարյանը: Դիտարկմանը՝ եթե բնակիչները դիմադրեն, պատասխանել է. «Պարտավոր ենք այս բարդ ժամանակաշրջանում միասին անցնել մեր ճանապարհը՝ անվտանգության տիրույթն ամուր պահելով»: Հարցին՝ եթե Աղավնոն չհանձնեն Ադրբեջանին, հնարավո՞ր է պատերազմ սկսվի, Քոչարյանն արձագանքել է. «Ամեն ինչ պետք է անենք, որ պատերազմ չսկսվի։ Դուք անընդհատ խոսում եք պատերազմից՝ մոտեցնելով պատերազմը, ես շատ լավ հասկանում եմ՝ ինչու եք դուք այդ հարցը տալիս, եկեք այնպես անենք, որ խաղաղություն ունենանք, մեր ժողովրդին խաղաղություն է պետք, որ վերքերը բուժի։ Մենք Աղավնոն չենք հանձնում, դուք այդպիսի հարց կարող եք տալ նախկին ղեկավարներին, որոնց դուք եք սպասարկում»։