«5 տարի ոչինչ չանելով՝ ինչպե՞ս լուծեցիք Ամուլսարի հանքի շահագործման բնապահպանական ռիսկերը». Թ. Ավետիսյան

341

Երեքշաբթի, 28 փետրվարի, 2023 թ., 17:06

«Կառավարության պատասխանատուն հայտարարում է, որ Ամուլսարի հանքի շահագործումը ՀՆԱ-ն կավելացնի շուրջ 1 տոկոսով, իսկ պետական բյուջեի մուտքերը կավելանան շուրջ 40 մլրդ դրամով, կստեղծվեն նաև հարյուրավոր աշխատատեղեր և կամրապնդվի տարածաշրջանի անվտանգությունը: Բացի դա, մենք տեղեկացանք, որ կառավարությունը նվեր է ստանալու շահագործող ընկերության 12,5 տոկոս մասնաբաժինը: Եվ ասում են, որ այսպիսի իրավիճակում իրավունք չունեն հրաժարվել նման հնարավորությունից»,- ԱԺ-ում՝ անդրադառնալով Ամուլսարի հանքի շահագործման՝ Կառավարության որոշմանը, ասաց «Հայաստան» խմբակցության պատգամավոր Թադևոս Ավետիսյանը:

Շարունակելով խոսքը՝ պատգամավորը նշեց. «Եթե իրավունք չունեիք, ապա ինչո՞ւ եք շուրջ 5 տարի փաստացի հրաժարվել այդ հնարավորությունից, որի հետևանքով մեր երկրի բյուջեն, ընդհանուր առմամբ, կորցրել է շուրջ 200 մլրդ դրամի չափով եկամուտներ, ՀՆԱ-ի շուրջ 5 տոկոս աճ և չեն բացվել այդ հարյուրավոր աշխատատեղերը: Հինգ տարի ոչինչ չանելով՝ այդ ինչպե՞ս լուծեցիք Ամուլսարի հանքի շահագործման բնապահպանական անկառավարելի ռիսկերի խնդիրը»: