Ռուսաստանը «պարտվել է էներգետիկ պայքարում». ՄԷԳ

Միջազգային էներգետիկ գործակալության ղեկավար Ֆաթիհ Բիրոլը հայտարարել է, որ Ռուսաստանը կորցրել է «համաշխարհային էներգետիկ համակարգի հիմնաքարերից մեկի» կարգավիճակը՝ կորցնելով գազի, նավթի և ածուխի առաջատար արտահանողի դերը:

Բիրոլը Ռուսաստանի ներխուժումն Ուկրաինա անվանել է «շրջադարձային» և ասել, որ «մեր աշխարհը երբեք նման խորության և բարդության էներգետիկ ճգնաժամի ականատես չի եղել»:

ՄԷԳ-ն ինքնավար միջկառավարական կազմակերպություն է Տնտեսական համագործակցության և զարգացման կազմակերպության (ՏՀԶԿ) կազմում։ Այն ունի 29 մասնակից երկիր։ Հիմնադրվել է Փարիզում 1974 թվականին 1973-1974 թվականների նավթային ճգնաժամից հետո։