«Կայացրեք խորհրդարանական բազմաբևեռություն, դա է Հայաստանի շանսը». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Եթե մի քիչ ծայրահեղացնեմ, անգամ արտգործնախարարությունը չպետք է ամբողջությամբ կիսի վարչապետի տեսակետը, ուր մնաց ԱԺ-ն կամ դրա նախագահը:
Եվ, եթե անգամ կիսում են կամ կիսում է՝ ապա այդ մասին չպետք է բարձրաձայնվի, որովհետև ԱԺ-ն այն «բաստիոնն» է, որտեղ վարչապետի տեսակետները հարկ եղած դեպքում կարող են «փշրվել»:
Կան քաղաքական պատասխանի որոշակի «ստանդարտներ», որոնք պետք է հնչեն այդօրինակ դեպքերում: Այդտեղ չեն լինում երկրորդական բաներ:
Ներքաղաքական կոնյուկտուրան էր թերևս բոլորին «համոզել», թե Հայաստանում խորհրդարանական կառավարման մոդելի անցումը լոկ Սերժ Սարգսյանի իշխանությունը հավերժացնելու համար է:
Իհարկե դժվար է տասնամյակով տեղեկատվա-քարոզչական պրեսինգի ենթարկված, առավել ևս կառավարող համակարգի անվերջությունից էլ զզված հանրությանը փաստարկել, որ խորհրդարանական կառավարման մոդելը ղարաբաղյան հարցում բարդացող միջավայրում Հայաստանի ճկունության փոքր ինչ բարելավման միջոցներից մեկն էր, է:
Բայց անում էի դա 2015-ից սկսած, բացատրելով, որ Սահմանադրության փոփոխությունն ու խորհրդարանի մոդելի անցումը «կեղծ օրակարգ» կամ պարզունակ իշխանատենչություն չէ, կամ՝ չէ միայն:
Կայացրեք խորհրդարանական բազմաբևեռություն, արեք առավելագույնը բրգաձեւ իշխանություն չստանալու համար, բարդացրեք Հայաստանի կառավարման քաղաքական համակարգը, հավատարմության տարաբնույթ երդումները փոխարինեք քաղաքական դիրքորոշումներով ու տեքստերով: Դա է Հայաստանի շանսը»: