ՌԴ-ն «Հարավկովկասյան երկաթուղու» շուրջ ստեղծված իրավիճակը համարել է «սեփականության վերաբաշխման» փորձ հօգուտ այլ երկրի

«ՌԴ ԱԳՆ մամուլի ծառայությունից հայտարարել են, որ առանց համոզիչ հիմնավորման «Հարավկովկասյան երկաթուղի» ընկերության (պատկանում է «Ռուսական երկաթուղիներ» ԲԲԸ-ին) կողմից հայկական երկաթուղիների կառավարման կոնցեսիոն պայմանագիրը դադարեցնելու մասին Երևանի համառ խոսակցությունների հետևում կարող է թաքնված լինել ռուսական նախագիծն օտարելու և այլ պետությունների փոխանցելու մտադրությունը»։

«Մենք ուշադիր հետևում ենք Հայաստանում ռուս տնտեսվարողների օրինական շահերին։ Այդ շահերի խախտումը ոչ միայն կվնասի հանրապետության ներդրումային միջավայրին, այլև կհանգեցնի Ռուսաստանի կողմից համապատասխան արձագանքի», - ընդգծել է նախարարությունը։

Նախարարությունը հայտարարել է, որ Մոսկվան շատ լուրջ է վերաբերվում Հայաստանի ղեկավարության հայտարարություններին ՀԿԵ կոնցեսիան երրորդ երկրին վաճառելու անհրաժեշտության մասին։ Երևանը պնդում է, որ Ռուսաստանի ներկայությունը զրկում է երկիրը մրցակցային առավելություններից՝ Արևմուտքի պատժամիջոցների սպառնալիքի պատճառով։ Իրականում, ռուսական ընկերությունը տարիներ շարունակ իր բոլոր եկամուտները ներդնում է հայկական երկաթուղային ենթակառուցվածքների պահպանման, վերանորոգման և զարգացման մեջ, բացատրել են նրանք։ Հայաստանի երկաթուղային ենթակառուցվածքները իրավաբանորեն կառավարության սեփականությունն են, բայց կառավարվում են «Ռուսական երկաթուղիներ» ընկերության 100%-անոց դուստր ձեռնարկության՝ «ՀԿԵ»-ի կողմից։ Կառավարումն իրականացվում է 2008 թվականին ստորագրված կոնցեսիոն պայմանագրի շրջանակներում՝ 30 տարի ժամկետով։

Արտգործնախարարությունը մեջբերել է ՀԿԵ-ի ներդրումների թվերը։ 2008 թվականից ի վեր ներդրումները կազմել են 30 միլիարդ ռուբլի, իսկ հարկերը՝ 15 միլիարդ ռուբլի։ Այս ընթացքում ընկերության կառավարման ներքո գործող մոտ 700 կմ երկարությամբ երկաթուղային ցանցից վերանորոգվել է ավելի քան 520 կմ։ Փոխարինվել է կոճերի կեսը, վերանորոգվել և վերակառուցվել է ավելի քան 50 կառույց, այդ թվում՝ 38 կամուրջ և 2 թունել։ Ավելին, Արտաքին գործերի նախարարությունը վստահեցրել է, որ ռուսական ընկերությունում աշխատում է ավելի քան 2500 մարդ։

Արտգործնախարարությունը շեշտել է, որ Հայաստանում ռուսական բիզնեսի գործունեության պայմանների թեման պարբերաբար բարձրացվում է հայկական կողմի հետ շփումներում։ Մոսկվային տարբեր մակարդակներում վստահեցրել են, որ ռուսական ներդրումները վտանգված չեն, սակայն, «ինչպես տեսնում ենք, այդ հայտարարությունները լիովին չեն համապատասխանում իրականությանը»։

«Ավելի ու ավելի շատ փորձագետներ համաձայն են, որ հանրապետությունում նկատվում են քաղաքական դրդապատճառներով «սեփականության վերաբաշխման» նշաններ»,- նշում է հրատարակությունը։