«Փաշինյանի այդ հայտարարությունը նաև հրավեր է մեր հակառակորդներին, թե եկեք այստեղ»․ Վարդան Հարությունյան

«90-ական թվականներից հետո քայլ առ քայլ գնացել ենք դեպի այս պատերազմը և պարտություն։ Իսկ 2018-ից Նիկոլ Փաշինյանի գլխավորությամբ և նրա քայլերի պատճառով մենք գլխապատառ վազել ենք դեպի այդ պատերազմը։ Եվ այդ պարտությունը թելադրում է մեզ իր պահանջները»,- «Ա1+»-ի հետ զրույցում ասել է իրավապաշտպան Վարդան Հարությունյանը՝ անդրադառնալով Նիկոլ Փաշինյանի այն հայտարարությանը, թե ճանաչում է Ադրբեջանի տարածքային ամբողջականությունը՝ Արցախի հետ միասին։

«Ձգեցինք սահմանագծում-սահմանազատումը, մնացինք ռուսական ծիրում, հրաժարվեցինք արևմտյան աջակցություններից և հասանք այս վիճակին։ Մենք հաշտության փաստաթուղթ պետք է ունեցած լինեինք վերջին երկու-երեք տարիների ընթացքում, որքան հնարավոր է շուտ։ Պետք էր մի նոր փաստաթուղթ, որը կփոխարիներ նոյեմբերի 9-ի հայտարարությունը»,- ասել է Վ․Հարությունյանը։