Ադրբեջանը 8 շաբաթից պետք է ներկայացնի իր պարտավորությունների կատարման վերաբերյալ հաշվետվությունը. Արդարադատության միջազգային դատարան

235

Ուրբաթ, 17 նոյեմբերի, 2023 թ., 19:12

Արդարադատության միջազգային դատարանը բավարարել է Ադրբեջանի նկատմամբ միջանկյալ միջոց կիրառելու մասին Հայաստանի ներկայացրած պահաջը՝ Ադրբեջանին պարտավորացնելով, ի թիվս այլ միջոցների, չխոչընդոտել Լեռնային Ղարաբաղ էթնիկ հայերի վերադարձը, ապահովել, որպեսզի մարդիկ, ովքեր մնացել են ԼՂ-ում, ցանկության դեպքում լքեն այն, ապահովել, որպեսզի այն անձինք, ովքեր մնացել են ԼՂ-ում 2023թ. սեպտեմբերի 19-ից հետո կամ վերադարձել են, զերծ մնան ուժի գործադրումից կամ ահաբեկումից, ինչը կարող է նրանց հեռանալու պատճառ դառնալ։

Դատարանն Ադրբեջանին պարտավորեցրել է նաև պահպանել հայերի ինքությունն ու մասնավոր սեփականության նկատմամբ իրավունքը հաստատող բոլոր փաստաթղթերը։ Ադրբեջանը 8 շաբաթից պետք է ներկայացնի իր պարտավորությունների կատարման վերաբերյալ հաշվետվությունը։

Հիշեցնենք՝ ՀՀ Միջազգային իրավական հարցերով ներկայացուցիչը Հայաստանի անունից սեպտեմբերի 28-ին դիմում էր ներկայացրել ՄԱԿ Արդարադատության միջազգային դատարան՝ Ռասայական խտրականության բոլոր ձևերի վերացման միջազգային կոնվենցիայի շրջանակներում քննվող «Հայաստանն ընդդեմ Ադրբեջանի» գործով Ադրբեջանի նկատմամբ ժամանակավոր միջոց կիրառելու խնդրանքով։