«Հայաստանում ամեն նոր օրն արդեն Աստծո պարգև է». Նարինե Կիրակոսյան

Լրագրող Նարինե Կիրակոսյանի ֆեյսբուքյան գրառումը․ «Հայաստանում ամեն նոր օրն արդեն Աստծո պարգև է։
Եթե աշխատանք ունես և դրա դիմաց, թեկուզ նվազագույն վարձատրություն ես ստանում, էլի Աստծո պարգև է։ Արցախցիների հետ զրուցելիս Հայաստանի աշխատավարձերի չափի մասին եմ լսում։ Իրենց մոտ, նույն գործին երկու, երեք, նույնիսկ չորս անգամ ավել են ստացել։ Դրա հետ մեկտեղ, բնակարանների վարձերն են շատ թանկ։
Այո, Հայաստանում ապրուստը ծանր է։
Չեմ մեկնաբանի այս պահին արցախյան ու հայաստանյան գները, մեկ է արդեն Արցախում հայ չկա ...
Բայց, մի բան պետք է արձանագրել. հիմա Հայաստանում ապրելու դժվարությունն էլ կհասկանան շատերը։
Էս պահին, կարևորը նոր հարձակում չլինի, սպառվել ենք։ Բայց և քաջ գիտակցում ենք, որ վաղվա օրը մշուշ է։
Ի՞նչ անել, կամ ի՞նչ է լինելու հարցերը մնում են արդիական, որովհետև նոր պատերազմի սպառնալիքն էլ մնում է։
Դրա համար, ես ինքս ինձ դաստիարակել եմ մեկ օրով ապրել ու այդ ամեն մեկ օրվա համար Փառք տալ։
Սա հուսահատություն էլ չի, այլ իրականությունն ընդունելն է, որովհետև մարդիկ ծայր աստիճան կրճատել են անձնական շփումները, խուսափում են բացասական լուրերից, վատառողջ են, հոգեպես դատարկված։ Նման իրավիճակում փրկությունն իրար հետ շփվելը կարող էր լինել, բայց ոնց հասկանում եմ ամեն մեկս էլ շատ քիչ մարդկանց հետ ենք արդեն ուզում լեզու թրջել, որովհետև դիմացինը կամ աչքիցդ է ընկել, կամ նախանձ է դարձել, դատարկ տեղը, կամ էլ ծանր նաֆաս իր խնդիրները գլխիդ բարդող, գլխիդ սարքող։
Երևի՞ էս դեպքում էլ, հարկավոր է թեթև ապրել, չկենտրոնանալ սրա ու նրա ասածներին։
Մի խոսքով, աղն է կորել մեր կյանքի, բայց այդ կյանքի տերը դու չես ու գոհ եղիր, որ դեռ ապրում ես»: