Երեքշաբթի, 21 ապրիլի, 2026 թ.
|
Ստեփանակերտում`   +8 °C

Ինչպես Օրբանի համար «մեկ բաժակ սուրճը» Ուկրաինային մոտեցրեց ԵՄ-ին. «Ռոսիյսկայա գազետա»

Ինչպես Օրբանի համար «մեկ բաժակ սուրճը» Ուկրաինային մոտեցրեց ԵՄ-ին. «Ռոսիյսկայա գազետա»
952
Շաբաթ, 16 դեկտեմբերի, 2023 թ., 21:54

«Ռոսիյսկայա գազետա»-ն գրում է՝ Օրբանի համար «մեկ բաժակ սուրճը» ճանապարհ բացեց Ուկրաինայի համար դեպի ԵՄ:

«ԵՄ-ն որոշում է կայացրել բանակցություններ սկսել ԵՄ-ին Ուկրաինայի և Մոլդովայի անդամակցության շուրջ։ Գագաթնաժողովում «կողմ» քվեարկելու համար եվրոպացի առաջնորդներն ստիպված են եղել շրջանցիկ ճանապարհներով դահլիճից հեռացնել Հունգարիայի վարչապետ Վիկտոր Օրբանին, որը նիստի ժամանակ ավելի քան 8 ժամ արգելափակել է այդ հարցի շուրջ քվեարկությունը: Իրավիճակը, որն ստեղծվել է ԵՄ գագաթնաժողովում, արժանի է հիմք դառնալու քաղաքական թրիլերի համար:

Գագաթնաժողովից անմիջապես առաջ Հունգարիայի վարչապետի հետ բանակցություններ են վարել Եվրոպական խորհրդի նախագահ Շառլ Միշելը, Եվրոհանձնաժողովի նախագահ Ուրսուլա ֆոն դեր Լյայենը, Ֆրանսիայի նախագահ Էմանուել Մակրոնը և Գերմանիայի կանցլեր Օլաֆ Շոլցը: Թվում է, թե հենց նրանք էին հետագա սցենարի հիմնական մասնակիցները: Երբ թվում էր, թե նիստում ուկրաինական հարցի քննարկումը փակուղի է մտել, Շոլցը Օրբանին հրավիրել է սուրճ խմելու: Դժվար է կռահել՝ ինչ են նրանք զրուցել, սակայն դրանից հետո Օրբանը լքել է նիստերի դահլիճը: Եվ այդ պահին ԵՄ երկրների ղեկավարները քվեարկել են բանակցություններ սկսելու օգտին:

Երբ Օրբանը վերադարձել է, գործն արդեն արված է եղել: Արդյունքում կարող էր թվալ, որ բոլոր կողմերն էլ հաղթող են ճանաչվել: Այդ քայլի համար Շոլցին համեմատել են «եվրոպական քաղաքականության մայր» Անգելա Մերկելի հետ:

Կարծես թե միջադեպն ավարտին է հասել, սակայն Օրբանը Օրբան չէր լինի, եթե լուռ հաշտվեր իրավիճակի հետ: Նա որոշումն անվանել է «վատ» և հայտարարել, որ Հունգարիան հնարավորություն կունենա ևս «75 անգամ արգելափակել Ուկրաինայի անդամակցության գործընթացը»:

Բանակցությունների մեկնարկը դեռ չի նշանակում, որ Ուկրաինան մի օր կմտնի ԵՄ։ Միայն հաջորդ տարվա մարտին պետք է հայտնվի գործընթացի սկզբնական «ճանապարհային քարտեզը», որը կարող է տևել տասնամյակներ: Հայտնի է Թուրքիայի օրինակը, որի հետ ԵՄ-ն բանակցություններ է սկսել դեռևս 2004 թվականին:

Եվրոպացի պաշտոնյաները հույս ունեն, որ հետագայում իրավիճակը կփոխվի, և Հունգարիային, այնուամենայնիվ, կհաջողվի համոզել: Ինչպես հայտարարել Է Բելգիայի վարչապետ Ալեքսանդր Դե Քրոոն, «գործարքը հնարավոր է, բայց ոչ հիմա»»,- գրում է ռուսական թերթը: