Շվեդիան չեղարկել է Թուրքիա ռազմական արտադրանքի արտահանման արգելքը

Շվեդիան չեղարկել է Թուրքիա ռազմական արտադրանքի արտահանման էմբարգոն և սկսել պաշտպանական արդյունաբերության ոլորտում Թուրքիային արտահանման լիցենզիաներ տրամադրել, հաղորդում է Yeni Şafak թերթը՝ վկայակոչելով Թուրքիայի փոխարտգործնախարար Բուրաք Աքչափարի հայտարարությունը:

«Այն բանից հետո, երբ խորհրդարանական կոմիտեն ընդունեց ՆԱՏՕ-ին Շվեդիայի անդամակցության առաջարկը, տեղի ունեցավ իրադարձությունների ուշագրավ զարգացում: Հայտնի դարձավ, որ Շվեդիան երկարատև էմբարգոյից հետո սկսել է Թուրքիային արտահանման լիցենզիաներ տրամադրել պաշտպանական արդյունաբերության ոլորտում»,- գրում է թերթը:

2019 թվականի հոկտեմբերին Շվեդիան էմբարգո էր սահմանել Թուրքիա պաշտպանական արդյունաբերության ոլորտում մատակարարումների վրա։ Դեկտեմբերի 26-ին Թուրքիայի խորհրդարանի արտաքին հարաբերությունների հանձնաժողովը ձայների մեծամասնությամբ պաշտպանել է ՆԱՏՕ-ին Շվեդիայի անդամակցության մասին արձանագրությունը, փաստաթուղթը փոխանցվել է Գլխավոր ասամբլեայի քննարկմանը: