«Հակված ենք լավատեսորեն մտածելու». Պեսկովը` Պուտին-Փաշինյան հանդիպման մասին

Կրեմլում լավատեսորեն են վերաբերվում ՌԴ նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպմանը, քանի որ կա երկխոսություն և առկա խնդիրները քննարկելու՝ ղեկավարների քաղաքական կամքը։

«Զրույցի բարդությունը, հավանաբար, պետք չէ չափազանցնել, իհարկե, մեր երկկողմ հարաբերություններում կան որոշակի խնդրահարույց թեմաներ»,- ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով այն հարցին, թե որքանով է դժվար լինելու զրույցը Պուտինի և Փաշինյանի միջև։ Լրագրող Պավել Զարուբինն իր թելեգրամ-ալիքում հրապարակել է «Ռոսիա-1» հեռուստաալիքին տված հարցազրույցից մի հատված։

Միաժամանակ Պեսկովը նշել է, որ որքան սերտ է երկու երկրների փոխգործակցությունը և որքան լայն է այդ հարաբերությունների համալիրը, այնքան հաճախ են տարբեր խնդիրներ առաջանում։ «Մենք տեսնում ենք, որ երկու ղեկավարների քաղաքական կամքը դա քննարկելն է, մենք կսպասենք արդյունքներին, կա երկխոսություն, կա քաղաքական կամք՝ շարունակելու այս երկխոսությունը, կա կողմերի փոխադարձ հետաքրքրություն, կա ներուժ, կան երկկողմ հարաբերություններ, ուստի այս դեպքում մենք բավականին հակված ենք լավատեսության»,- ասել է Պեսկովը։