«Տեսանյութերն ապացուցում են մեղադրանքի անհիմն լինելը»․ փաստաբան

Երևանի ընդհանուր իրավասության դատարանում այսօր ԱԺ «Հայաստան» խմբակցության պատգամավոր Լևոն Քոչարյանի և Սերգեյ Ասատուրովի գործով դատական հերթական նիստն էր։ Քննարկվեցին նախաքննական մարմնի ներկայացրած ապացույցները, մասնավորապես՝ տեսագրությունները։

Պաշտպանական կողմը պնդեց, որ տեսանյութերն իրականում փաստում են ոստիկանների գործողությունների անօրինականությունն ու ներկայացված մեղադրանքի անհիմն լինելը։
Ըստ մեղադրանքի՝ Լևոն Քոչարյանը հպվել է ոստիկանին։ «Դուք այդտեղ ոստիկանին հպվել տեսա՞ք։ Լևոն Քոչարյանը և մյուսները պարզապես մոտենում են ոստիկաններին և դեմ-դիմաց կանգնում։ Մեկ վայրկյան հետո Լևոն Քոչարյանին բռնությամբ սկսում են բերման ենթարկել։ Հետո, ըստ մեղադրանքի, Լևոն Քոչարյանը խոչընդոտում է բերման ենթարկելը, երբ նրա ձեռքերն ազատ չեն, և նայեք տեսանյութը՝ ո՞նց է խոչընդոտում, որ այնտեղ ոչ մեկին բերման չեն ենթարկում»,-ասաց Էրիկ Ալեքսանյանը՝ հավելելով, որ եթե մեղադրանքը կազմված է այդ տեսագրության հիման վրա, որտեղ պարզապես հերքվում է մեղադրանքը, ապա նա ավելացնելու ոչինչ չունեի։
Հիշեցնենք, որ 2023թ․ սեպտեմբերի 22-ի ոստիկանները անհնազանդության ակցիայի ժամանակ բռնի ուժի կիրառմամբ բերման էին ենթարկել Լևոն Քոչարյանին։ Նույն օրը Քոչարյանը ձերբակալվել էր՝ ոստիկանության ծառայողների նկատմամբ բռնություն գործադրելու մեղադրանքով։
Նիստի մանրամասները՝ տեսանյութում