«Անկախացումից հետո 27 հազար գույք մասնավորեցվել է». Սիսակ Գաբրիելյան

ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանի գրառումը. «Անցած 30 տարիների ընթացքում պետության սեփականություն հանդիսացող ավելի քան 20 հազար անվանում գույք, այդ թվում՝ մարզադպրոցներ, մարզադաշտեր, մշակութային հաստատություններ, ԴՕՍԱՖ-ներ, հիվանդանոցներ, դպրոցներ, մանկապարտեզներ, արտադրական տարածքներ և այլն, մասնավորեցվել, նվիրաբերվել կամ առերևույթ կոռուպցիոն սխեմաներով փոխանցվել են տարբեր հասարակական կազմակերպություններին, որոշ դեպքերում՝ նրանց իրական շահառու հանդիսացող նախկին բարձրաստիճան պաշտոնյաների ընտանիքներին: Հանրության բարեկեցության համար կարևոր այս գույքերի մեծ մասն այսօր գոյություն չունի, եղածների մի մասն էլ, ցավոք, երբեմն մամուլից տեղեկանում ենք, որ գտնվում են իրացման փուլում կամ արդեն վաճառվել է:
Գլխավոր դատախազությունը, շուրջ երկու տասնյակ գույքերի մասով ուսումնասիրելով դիմումներս, արդեն իսկ հայցադիմումներ է ներկայացրել դատարան (ԴՕՍԱՖ, Սպարտակ և այլն)
Առկա գույքերի շուկայական արժեքն, ըստ նախնական հաշվարկների, մոտ 1,5 միլիարդ դոլար է:
Մինչ իրավապահ մարմինները կուսումնասիրեն պետությանը պատկանող գույքերը մասնավորին փոխանցելու գործընթացի օրինականությունը, ներկայացված օրենքի նախագծով առաջարկում ենք.
1. Ցուցակագրել այս գույքերը:
2. Դրանց օտարումը կամ գրավադրումը թույլատրել բացառապես.
ա) հանրային լսումներ կազմակերպելուց հետո,
բ) տվյալ կազմակերպության գործադիր մարմնի ընդհանուր անդամների 2/3 ստորագրության դեպքում:
Հ.Գ.
Նախագծի նպատակը որևէ անհատից կամ կազմակերպությունից գույքը «խլելը» չէ: Անկախ սեփականատիրոջից՝ այդ գույքերը ստեղծվել են բոլորիս ջանքերով և պետք է շարունակեն ծառայել բոլորիս:
Հ.Գ. շնորհակալություն Հետք լրատվականին թեմայի վերաբերյալ մի շարք հետաքննական հոդվածների համար»: