Գերմանական խանութներում բանանի փաթեթներում կոկաին են հայտնաբերել

Գերմանիայի Հյուսիսային Ռեյն-Վեստֆալիա դաշնային նահանգի սուպերմարկետների ցանցի մի քանի մասնաճյուղերում ընդհանուր առմամբ 95 կգ թմրանյութ է հայտնաբերվել: Թմրանյութերի փաթեթները եղել են բանանի արկղերում, հայտնում է dpa-ն։

Հայտնաբերված կոկաինի արժեքը սև շուկայում գնահատում է ավելի քան 7 միլիոն եվրո։ Բանանի բեռը, որում հայտնաբերվել է թմրանյութը, ժամանել է Հարավային Ամերիկայից։ Մյոնխենգլադբախի ոստիկանությունն ու դատախազությունը կարծում են, որ այս խմբաքանակը սխալմամբ է հայտնվել սուպերմարկետների ցանցում։ Կատարվում է հետաքննություն։

Սա առաջին դեպքը չէ, երբ Գերմանիայում բանանի փաթեթներում կոկաին են հայտնաբերում։ Նման միջադեպ տեղի է ունեցել 2015 թվականին նույն դաշնային նահանգում, ինչպես նաև հարևան Ներքին Սաքսոնիայում։