«Ընտրակեղծիքների «հայկական կարուսելը» և «բալկանյան կարուսելը» տարբեր բաներ են». Դանիել Իոաննիսյան

ԻՔՄ ծրագրերի համակարգող Դանիել Իոաննիսյանի ֆեյսբուքյան գրառումը. «Մեռանք բացատրելով, որ ընտրակեղծիքների «հայկական կարուսելը» և «բալկանյան կարուսելը» տարբեր բաներ են։
Առաջինը քվեաթերթիկների կարուսել է, վերահսկվող քվեարկության տարատեսակ, երբ դուրսը ընտրողին տալիս են լրացրած քվեաթերթիկ և ընտրողը տեղամասից դուրս է հանում մաքուր քվեաթերթիկը։ Սա անում են, որ, ասենք, ընտրակաշառք վերցրած ընտրողը չկարողանա այլ կերպ քվեարկի։
Երկրորդը, որը երբեմն նաև «բասինգ» են կոչում, բազմակի քվեարկության մեխանիզմ է, որում նույն անձը պտտվում է տարբեր տեղամասերով ու ամեն տեղ քվեարկում է։ Այս անձինք սովորաբար քվեարկում են երկրից բացակայողների փոխարեն։
Վրաստանի նախագահ Սալոմե Զուրաբիշվիլլին նկարագրել է երկրորդը, բայց այն անվանել է «հայկական կարուսել»։
Խնդրում եմ, մի աղավաղեք ընտրակեղծիքների անվանումները»։