«Անկախություն շատ դժվար է ձեռք բերել, բայց շատ ավելի հեշտ է կորցնել». Դավիթ Մանուկյան

«Ապրելու երկիր» կուսակցության քաղաքական խորհրդի անդամ Դավիթ Մանուկյանի ֆեյսբուքյան գրառումը. «Աշխարհում մինչև 10 հազար ազգ կա, որոնցից ընդամենը 195-ն ունեն անկախ պետություն։ Դարեր շարունակ հայ ազգը պայքարել է իր ինքնության պահպանման, իր հայրենիքի պաշտպանության, իր ազատ ու անկախ ապրելու իրավունքի համար։ Մենք այսօր ունենք անկախ պետություն, որի կերտման ճանապարհին հազարավոր հայորդիներ իրենց կյանքն են զոհել։
Անկախություն շատ դժվար է ձեռք բերել, բայց շատ ավելի հեշտ է կորցնել։ Դրա համար, սիրուն խոսքերից անդին, պետք է հասկանալ, որ անկախությունը՝ դա ամենօրյա նվիրում է, ծանր աշխատանք, գաղափար է, պայքար։ Իրապես անկախ լինելու համար պետք է լինել ուժեղ, ունակ՝ պաշտպանելու ինքդ քեզ, քո պետական շահն առաջ տանելու։ Պետք է կարողանալ զգալ ու տեսնել եկող վտանգները, քանի դեռ նրանք չեն հարվածել քեզ։
Մեր ազգային ամենամեծ խնդիրներից մեկն այն է, որ սկզբում ծանր սխալներ ենք թույլ տալիս, հետո փորձում մեծ կորուստների գնով ուղղել դրանք։ Այդպես չպետք է լինի: Մենք այդքան ռեսուրս չունենք՝ այդքան ժամանակ, մարդ և հող չունենք։
Շնորհավորում եմ բոլորիս Հայաստանի Հանրապետության անկախության տոնի կապակցությամբ։ Սա իրապես հպարտանալու օր է, ափսո՜ս, որ այդ հպարտությունը խոնարհվել է Արցախի կորստով։
Փա՛ռք ու պատիվ բոլոր նրանց, ովքեր իրենց կյանքը դրեցին, որպեսզի Հայաստանը ապրի հավե՜րժ։
Շնորհավո՛ր տոնդ, Հայաստա՛ն»։