«Սիրիայում գրոհը սկսելուց առաջ Էրդողանը հեռախոսազրույցներ է ունեցել Պուտինի հետ»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Հայաստանում, այն էլ ակադեմիական կրթությամբ հարգարժան մարդիկ, Ռուսաստանին «բացատրում» են իր շահը, «բացատրում» են, որ Թուրքիան խաբող է, Թուրքիան մեջքից խփող է, Թուրքիային վստահել չի կարելի: «Բացատրում» են ու զարմանում, որ «այդքան բացատրելուց» հետո Ռուսաստանը էլի չի «հասկանում»:

Ռուսաստանին, որն ունի Թուրքիայի հետ փոխհարաբերության ավելի քան հարյուր տարվա պատմություն, այն էլ գերհագեցած պատմություն, այսպես ասած «կյանքի բոլոր օրինակներով» պատմություն, Հայաստանից բացատրում են, թե ինչ է Թուրքիան:

Իբր, մենք գիտենք, թե ինչ է Թուրքիան, Ռուսաստանը չգիտե, ու այսքան ասելուց հետո չի էլ հասկանում:

Եվ մենք կարող ենք մտածել, թե Ռուսաստանին այստեղից «ինչ է Թուրքիան» թեմայով բացատրությունները ավելի լուրջ զբաղմունք են, քան օրինակ «ռիլզ» նկարելն ու սոցցանց գցելը:

Մենք լրջությանը և լրջմտությանը վերաբերում ենք դեմքի արտահայտությամբ, ֆիզիկական զբաղմունքով կամ բառամթերքով, բայց երբեք՝ ոչ բովանդակությամբ:

Եվ վերստին եմ հիշեցնում, ընկերնե՛ր, Սիրիայում գրոհը սկսելուց առաջ Էրդողանը հեռախոսազրույց է ունեցել Պուտինի հետ՝ նոյեմբերի 24-ին: Մյուս հեռախոսազրույցն ունեցել է տասն օր անց, ըստ էության՝ եզրափակիչ փուլից առաջ՝ դեկտեմբերի 5-ին»: