Հունգարիան ապահովել է պատրիարք Կիրիլի բացառումը ԵՄ պատժամիջոցների 15-րդ փաթեթից

2607

Երկուշաբթի, 16 դեկտեմբերի, 2024 թ., 19:18

Հունգարիայի արտաքին գործերի նախարար Փեթեր Սիյարտոն հայտարարել է, որ երկիրը կարողացել է բացառել Եվրոմիության պատժամիջոցների 15-րդ փաթեթից Մոսկվայի և Համայն Ռուսիո պատրիարք Կիրիլին, ՄԱԿ-ում Ռուսաստանի մշտական ներկայացուցիչ Վասիլի Նեբենզյային և Ռուսաստանի օլիմպիական կոմիտեն:
«Հոգևորականների դեմ պատժամիջոցները կկործանեն խաղաղության նույնիսկ վերջին հույսը»,- ասել է Սիյարտոն։ Միևնույն ժամանակ, նա բացատրել է, որ Հունգարիան աջակցում է Ռուսաստանի դեմ ԵՄ-ի պատժամիջոցների 15-րդ փաթեթը, քանի որ այնտեղից հնարավոր է «հանել ամենախենթ գաղափարները»։ Մասնավորապես, երկարաձգվել է հունգարական MOL-ի արտոնությունը ռուսական հումքից նավթամթերքի արտահանման համար, պարզաբանել է Հունգարիայի արտաքին գործերի նախարարության ղեկավարը։

Այսօր ԵՄ-ն ներկայացրել է պատժամիջոցների նոր փաթեթ, որում ներառվել է 84 ֆիզիկական անձ, այդ թվում՝ 30 ընկերություն։ Նրանց թվում են լրագրող, հեռուստահաղորդավար և «Գազպրոմ-Մեդիա»-ի գլխավոր տնօրենի տեղակալ Թինա Կանդելակին, երգչուհի Լարիսա Դոլինան, «Ավտոդոր»-ի ղեկավար Վյաչեսլավ Պետուշենկոն», «Ուրալդրոնզավոդ» ՍՊԸ-ն, «TSK Vector» ՍՊԸ-ն, «SPP NPK» ԲԲԸ-ն, «ՊԻԿ» զարգացման խումբը, «UTair» ավիաընկերության ղեկավարը և այլն: Սահմանափակումները վերաբերել են նաև Կազանի բնիկներին՝ «Ռուսական ուղղաթիռների» գլխավոր տնօրեն Նիկոլայ Կոլեսովին և Մորդովիայի ղեկավար Արտեմ Զդունովին։ Բացի այդ, դրանք ազդել են Թաթարստանից երկու ընկերությունների վրա՝ Alabuga Development LLC-ի և Drake LLC-ի:

Միաժամանակ, Սիյարտոն ասել է, որ ԵՄ ԱԳՆ խորհրդում ոչ ոք չի աջակցել Ուկրաինայում Սուրբծննդյան հրադադարի մասին Հունգարիայի առաջարկին։ Շատերը, նրա խոսքով, նույնիսկ դեմ էին դրան։

Նա նաև հայտարարել է, որ Հունգարիան չի աջակցի ԵՄ-ի զորքերը որևէ նպատակով Ուկրաինա ուղարկելուն:

Հիշեցնենք, որ դեռ մայիսին Հունգարիայի վարչապետ Վիկտոր Օրբանը հայտարարել էր, որ երկիրը չի աջակցում պատրիարք Կիրիլի ընդգրկմանը ԵՄ պատժամիջոցների ցուցակում։ Ինչպես գրել է ՏԱՍՍ-ը, նա կրոնի ազատության հարցը «սուրբ և անձեռնմխելի» է որակել։

Հունգարիան նաև կոչ է արել 2022 թվականին Ռուս ուղղափառ եկեղեցու առաջնորդին չընդգրկել ԵՄ պատժամիջոցների ցուցակում։ Լրատվամիջոցները գրել են, որ այս և մի շարք այլ պահանջներ ձգձգում են Ռուսաստանի դեմ սահմանափակումների հաստատումը։