Ուկրաինան հայտնել է ՌԴ ռազմածովային ուժերի «Ան-72» ինքնաթիռի պայթեցման մասին

929

Ուրբաթ, 20 դեկտեմբերի, 2024 թ., 20:30

Ուկրաինայի ՊՆ գլխավոր հետախուզական վարչության հայտարարության համաձայն՝ ուկրաինացի դիվերսանտները հարձակում են իրականացրել Մոսկվայի մերձակայքում գտնվող «Օստաֆևո» օդանավակայանի վրա, որտեղ պայթեցվել է ՌԴ ռազմածովային ուժերի «Ան-72» ռազմատրանսպորտային ինքնաթիռը։ Սակայն ռուս փորձագետներն արագ հերքել են այս տեղեկությունը։

Ուկրաինական կողմի հաղորդագրության համաձայն՝ միջադեպը տեղի է ունեցել դեկտեմբերի 12-ին Օստաֆևո օդանավակայանում, որտեղ, իբր, պայթյունի հետևանքով վնասվել է ինքնաթիռի գլխավոր ուժային կենտրոնը։ Ուկրաինական հետախուզության տվյալներով՝ այս ինքնաթիռի արժեքը մոտավորապես 4,5 մլն դոլար է։

Սակայն ռուս վերլուծաբանները հերքել են պայթյունի մասին լուրերը: Նրանք ընդգծել են, որ օդանավակայանը ներկայում չի գործում։ Վերջին տարիներին օդանավակայանը հիմնականում օգտագործվել է կորպորատիվ բիզնես ինքնաթիռների և Արտակարգ իրավիճակների նախարարության ուղղաթիռների սպասարկման համար։ Հաղորդվում է, որ «Օստաֆևո»-ից բոլոր չվերթները դադարեցվել են 2024 թվականի սկզբից։

Ներկա պահին օդանավակայանի տեխնիկական գոտում մի քանի «Ան-72» ինքնաթիռ կա, որոնք սպասում են վերանորոգման, սակայն դրանց հետ կապված միջադեպեր չեն եղել, հաղորդում է «Պատերազմ կեղծիքների հետ» թելեգրամ-ալիքը։

Վերլուծաբանները նաև նշել են, որ որպես պայթյունի մասին տեղեկությունների ապացույց՝ ուկրաինական աղբյուրները ներկայացրել են տեսանյութ, որում միայն լուսաբռնկիչ է երևում, որով դեպքի ճշգրիտ վայրը և ժամը հաստատել հնարավոր չէ։