Մագդեբուրգի տոնավաճառում տեղի ունեցած ահաբեկչության հեղինակը գրություն է թողել

Մագդեբուրգի սուրբծննդյան տոնավաճառում ամբոխի մեջ մխրճված Սաուդյան Արաբիայի 50-ամյա քաղաքացու ավտոմեքենայում կտակ է հայտնաբերվել, հայտնում է գերմանական Der Spiegel ամսագիրը։
Der Spiegel-ի փոխանցմամբ՝ տղամարդն իր ունեցվածքը կտակել էր գերմանական Կարմիր խաչի ընկերությանը։ Հաղորդվում է, որ գրությունը քաղաքական հայտարարություն չի պարունակել:

Հարձակվողը 2024թ. մայիսին X-ի իր էջում գրել էր, որ ծրագրում է մահանալ «այս տարի»։ BMW-ն, որով նա մխրճվել էր ամբոխի մեջ, վարձակալել էր մեկ շաբաթ առաջ: Ըստ լրատվամիջոցի՝ տղամարդը մտածում էր, որ հարձակման ժամանակ կզոհվի:
Հիշեցնենք, որ ուրբաթ երեկոյան Մագդեբուրգի սուրբծննդյան տոնավաճառում ավտոմեքենան մխրճվել է ամբոխի մեջ։ Հարձակման հետևանքով զոհվել է հինգ մարդ, ավելի քան 200-ը վիրավորվել են: