Չորեքշաբթի, 10 սեպտեմբերի, 2025 թ.
|
Ստեփանակերտում`   +26 °C

«Եթե չսովորենք ճիշտ օգտագործել հակաբիոտիկները, մի քանի տարուց պարզ հիվանդություններ չենք կարողանալու բուժել». Անահիտ Ավանեսյան

«Եթե չսովորենք ճիշտ օգտագործել հակաբիոտիկները, մի քանի տարուց պարզ հիվանդություններ չենք կարողանալու բուժել». Անահիտ Ավանեսյան
1488
Հինգշաբթի, 02 հունվարի, 2025 թ., 21:30

«Էլեկտրոնային դեղատոմսերի բարեփոխման ծրագիրը շատ լայն շրջանակ է ներառում, ուստի շատ բարդ է միանգամից՝ մեկ օրում կամ ամսում հասնել նրան, որ ամբողջ համակարգին անշեղորեն հետևեն բոլոր քաղաքացիները»,- «Ֆակտոր»-ի եթերում նշեց ՀՀ առողջապահության նախարար Անահիտ Ավանեսյանը՝ ի պատասխան այն դիտարկման, որ «էլեկտրոնային դեղատոմսում գործող 500 դեղերը շատ հաճախ անարգել վաճառվում են դեղատներում՝ առանց դեղատոմսի»:

Անդրադառնալով հակաբիոտիկների կիրառմանը՝ նախարարն ընդգծեց. «Եթե մենք չսովորենք ճիշտ օգտագործել հակաբիոտիկները՝ ըստ բժշկի ցուցման, մի քանի տարուց մենք շատ պարզ հիվանդություններ, օրինակ՝ թոքաբորբը, ի վիճակի չենք լինելու բուժել: Այսինքն՝ մենք փորձում ենք, որ մարդիկ ինքնաբուժությամբ չզբաղվեն»:

Ավանեսյանի խոսքով՝ որոշվել է մյուս դեղերի շարքը ևս միայն էլեկտրոնային դեղատոմսով վաճառվող դեղերի ցանկում ներառելը հետաձգել 6 ամսով, որպեսզի այն փոփոխությունը, որ իրականացվել է, մարդիկ՝ քաղաքացիները, բժիշկները, ինչպես նաև դեղատները մի քիչ ավել ժամանակ ունենան՝ սահուն կերպով կիրառելու:

«Ամենազարգացած երկրներում էլ թվայնացման գործընթացը անցնում է շատ բարդ գործընթացներով»,- նկատեց Ավանեսյանը՝ հավելելով, որ Հայաստանն իր առջև հավակնոտ ծրագիր է դրել և հասնելու է հաջողության:

«Եթե չսովորենք ճիշտ օգտագործել հակաբիոտիկները, մի քանի տարուց պարզ հիվանդություններ չենք կարողանալու բուժել». Անահիտ Ավանեսյան