«Հայաստանի ղեկավարի վարքագիծը դավաճանության տպավորություն է թողնում»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Ադրբեջանի սպառնալիքները և Հայաստանի անատամ արձագանքը․
Ադրբեջանի նախագահ Իլհամ Ալիևի վերջին հայտարարությունները՝ ուղղված Հայաստանին, ներառում են բացահայտ սպառնալիքներ, «ֆաշիստ» պիտակավորումներ և «Արևմտյան Ադրբեջան» հասկացության առաջմղում։ Այս հռետորաբանությունը միտված է ոչ միայն ճնշում գործադրել Հայաստանի վրա, այլև արդարացնել ապագա ագրեսիվ գործողությունները։ Ալիևի ռազմավարությունը ներառում է պատմական փաստերի մանիպուլյացիա, միջազգային ասպարեզում Հայաստանի վարկաբեկում և տարածքային պահանջների առաջադրում։
Այս ֆոնին Հայաստանի ղեկավարի վարքագիծը՝ հեծանիվ քշելը, փոդքասթ վարելը, կենցաղային տեսարանները, որոշ շրջանակներում ընկալվում է որպես անկեղծ, սակայն հանրության մեծ մասի համար այն թուլության, եթե կուզեք, անլրջության, եթե կուզեք, դավաճանության տպավորություն է թողնում՝ հատկապես անվտանգության լուրջ սպառնալիքների պայմաններում։
Տարածաշրջանային դինամիկայում Հայաստանի դիրքերը ամրապնդելու համար անհրաժեշտ է հստակ ազգային ռազմավարություն, ավելի ակտիվ դիվանագիտություն և հանրային միասնականություն։ Պետական քաղաքականության ցանկացած դրսևորում պետք է լինի լուրջ և նպատակաուղղված՝ դիմակայելու տարածաշրջանային մարտահրավերներին, ինչը ցավոք սրտի հնարավոր չէ իրականացնել, անլուրջ, եթե կուզեք, ոչ կեմպետենտ, եթե կուզեք, փնթի ղեկավարության միջոցով»։