«Գյումրիից ռուսական ռազմաբազան հանելը նոր արկածախնդրություն է»․ Իշխան Սաղաթելյան

«Գյումրիից 102-րդ ռուսական ռազմաբազան հանելը նոր արկածախնդրություն է»,- ասուլիսի ժամանակ հայտարարեց ԱԺ «Հայաստան» խմբակցության պատգամավոր Իշխան Սաղաթելյանը։ «Բազան Հայաստանում ունի առաքելություն. Հայաստանին թողնել անպաշտպան՝ Թուրքիայի և Ադրբեջանի երախում այս աշխարհաքաղաքական իրավիճակում, այս պայմաններում, արկածախնդրություն է, և Հայաստանին բերելու է անվտանգային նոր սպառնալիքներ»,- նշեց Սաղաթելյանը։
Լրագրողի հարցին, թե այսքան ժամանակ բազան ինչ-որ բան արե՞լ է ՀՀ անվտանգությունն ապահովելու համար, ընդդիմադիր պատգամավորն արձագանքեց․ «Իհարկե արել է, եթե այդ բազան վերջին 20 տարվա մեջ Հայաստանում չլիներ, հայ-թուրքական սահմանը չպահեր, ի՞նչ տեղի կունենար։ Մենք կարո՞ղ ենք ֆիքսել, որ Թուրքիան և Ադրբեջանը սպառնալիք են ՀՀ-ի համար, մինչև հիմա հավակնություն ունե՞ն հայկական տարածքների նկատմամբ, թե՞ ոչ․ այո, նրանք սպառնալիք են, և մեր հնարավորությունները բավարար չեն մեր երկրի տարածքային ամբողջականությունը պաշտպանելու համար, հետևաբար հայ-ռուսական դաշնակցային ռազմավարական հարաբերությունները կարևոր են այս գործընթացում»։