«Մեր հասարակությունը խիստ կարիք ունի օրինակելի կերպարների». Մանուշ Եսայան

Փաստաբան Մանուշ Եսայանի ֆեյսբուքյան գրառումը. «Աչքովս ընկավ, որ Վազգենի մասին ֆիլմ է նկարահանվել, ինչը ողջունելի է։ Կարծում եմ՝ մեր հասարակությունը խիստ կարիք ունի օրինակելի կերպարների, ու էդ կերպարները չպետք է միայն ռազմական լինեն։ Ավելին, եթե անգամ ռազմական, ապա այդ կերպարները միայն Վազգենը չէ, այլ նաև բազմաթիվ այլ ազգանվեր հայեր։ Չպետք է ազգայինի հայրենասերիրության սերմանումը մեկ անձի շուրջ ստեղծվի և պտտվի, որպեսզի չլինի ընկալում, որ հայամետ ազգանվեր լինելը բացառիկության նշան է։ Մենք պետք է ընկալենք ու գիտակցենք որ ազգային հայրենատեր տեսակը նորմալ է, այլ ոչ թե հերոսություն։ Մենք պարտավորություն ունենք այդ գաղափարի մեջ տեղավորելու և´ հայ գործարարին, և´ ուսուցչին, և´ ճարտարապետին, և´ իրավաբանին, և´ բժշկին և այլոց, և, անշուշտ, զինվորին։ Մենք կարիք ունենք հայի տեսակի ներկայացման՝ այդ տեսակի գաղափարախոսության և ընկալման ամրապնդման։ Մենք կարիք ունենք վերջապես արմատացնելու այն միտքը, որ հարուստ լինելը ամոթ չէ, ոչ էլ սխալ, որ լավ մեքենա վարողը գող կամ թալանչի չէ, որ երկրին ծառայելը հերոսություն չէ, որ գործը լավ անելը առավելություն չէ, որ լավ ուսուցիչը կամ բժիշկը բացառիկ կերպարներ չեն ու վերջապես, որ լավ մարդ լինելը երբեք ու ոչ մի դեպքում չի նշանակում լինել լավ կառավարիչ, ղեկավար, գեներալ կամ նախարար։
Մենք կարիք ունենք ազգային մտքի, նպատակի, տեսակի ձևավորման։ Ցավոք շատ ենք ուշացել, բայց դեռ կարող ենք»: