«Թող Մխիթար Հայրապետյանը հանգիստ լինի, մեր տան խոսակցությունը չեմ հրապարակի»․ Հակոբ Ասլանյան

«Թող Մխիթար Հայրապետյանը հանգիստ լինի, ես երբեք չեմ հրապարակի այն ամբողջ խոսակցությունը, որ իմ տանը՝ մոտ մեկուկես ժամ տեղի է ունեցել։ Ես երբեք դրա մասին չեմ խոսի, կպահեմ իմ տղամարդկային խոստումը»,- ասել է ԱԺ անկախ պատգամավոր Հակոբ Ասլանյանը։
Հիշեցնենք, որ ԲՏԱ նախարար Մխիթար Հայրապետյանը ասուլիսի ժամանակ պատմել էր, թե ինչպես է Հակոբ Ասլանյանին օգնել ֆեյսբուքյան գրառման տեքստի հարցում․ «Այդ օրը ես իրեն նման նամակ գրել եմ, ինքը զանգահարել է և ես իրեն այցելել եմ, գնացել եմ իրենց տուն, հասկացել եմ, որ պահի տակ որոշակի էմոցիոնալ գնահատակներ է հնչեցրել։ Առաջարկել է՝ իրեն օգնեմ, որ համապատասխան տեքստ հրապարակվի, որից հետո ես տեքստն ուղարկել եմ, որը ինքը հրապարակել է։ Ես պետք է ասեմ, որ վերջին 3 տարիներին հաճախակի շփումներ չեմ ունեցել, բայց ինձ հետաքրքրել է պատճառը»,- ասել էր նա՝ նշելով, թե Ասլանյանն իր հետ կիսվել է, որ զղջում է այդ հայտարարության համար։ «Թե որքանով էր անկեղծ իր կողմից այդ երկխոսությունը, խնդրանքը, թե որքանով էր պատահաբար տեքստի փոխարեն սքրինշոթ արել և հրապարակել, որքանով էր ուզել ինձ վնասել, ես այդ ամենը թողնում եմ անորոշությանը, ինձ ընդհանրապես դա չի հետաքրքրում»,- ասել էր Հայրապետյանը։