«Մեր կատարած գործունեությունը բխում է վարչապետի մատնանշած նպատակներից»․ Հայկ Սարգսյան

«Ես չգիտեմ՝ նման կեղծ ու արատավորող հայտարություններ ով է տարածում, այդ հարցն ինձ էլի են տվել, նման բան չկա»,- այս մասին ԱԺ-ում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Հայկ Սարգսյանը՝ անդրադառնալով հարցին, թե արդյոք Նիկոլ Փաշինյանի «սև ցուցակում» է հայտնվել, մասնավորապես, Հայկ Ղալումյանի հետ կապված միջադեպից հետո, և Փաշինյանը փորձում է ճշտել՝ ի՞նչ մոտիվացիա ունի:

Պատգամավորը վստահեցրեց, որ վարչապետի հետ հարաբերությունները հիմա շատ լավ են․ «Նիկոլ Փաշինյանի հետ մեր հարաբերությունները բարձր մակարդակի վրա են երկուստեք, և ավելի լավ վերջին 5 տարվա ընթացքում չի եղել, քան հիմա»։

Անդրադառնալով դիտարկմանը, որ Նիկոլ Փաշինյանի հետ տարաձայնություններ ունեցող ՔՊ-ականները հայտնվում են նրա թիրախում, Սարգսյանը նշեց․ «Մենք բոլորս ենք սատարում վարչապետին, և մեր կատարած գործունեությունը բխում է վարչապետի մատնանշած նպատակներից»։