«Մոսկվան փորձում է ուտել Ուկրաինան, բայց այդ երկիրը դյուրամարս չէ». Նարինե Մկրտչյան

Մամուլի ազգային ակումբի նախագահ Նարինե Մկրտչյանը ֆեյսբուքյան իր էջում գրել է. «Ըստ ԶԼՄ-ների՝ ՌԴ նախկին դրածո նախագահ, այժմ ԱԽ փոխնախագահ Դմիտրի Մեդվեդևը Ուկրաինայի և հրադադարի հարցերով Ռուսաստան-ԱՄՆ բանակցություններն անվանել է «ընթրիքի սեղան՝ «կիևյան կոտլետի» հիմնական ուտեստով:
Արդեն քանի տարի է Մոսկվան փորձում է ուտել Ուկրաինան, բայց այդ երկիրը դյուրամարս չէ և մնում է Մոսկվայի կոկորդում։
Մեդվեդևն իր իսկ «սրամտությունից» ոգևորված՝ հիշել է նաև բանակցությունների այլ ուտեստներ՝ «բրյուսելյան կաղամբ, բրիտանական ձուկ և չիփս, փարիզյան աքաղաղ»։
Ուկրաինայի նախագահ Վլադիմիր Զելենսկին, ի պատասխան Մեդվեդևի ցինիզմի, ընդգծել է, թե՝ «Մենք աղցան կամ կոմպոտ չենք, որ Պուտինի ճաշացանկում լինենք՝ չնայած նրա ախորժակին»
Զելենսկին հայերեն չգիտե, հակառակ դեպքում Մեդվեդևին կպատասխաներ հայերեն՝ կարճ ու կոնկրետ՝ «Ախորժակիդ՝ քացախ»»: