«Պետք է կասեցվի այն ոստիկանների պաշտոնավարումը, որոնք առնչություն ունեն Տիգրանի խոշտանգման հետ»․ Ռոման Երիցյան

ՔԿ-ում տեղի ունեցած հանդիպման ժամանակ պարզվել է, որ գերատեսչությունում չգիտեն՝ ովքեր են այն 6 ոստիկանները, որոնք խոշտանգման են ենթարկել Տիգրանին։ Այս մասին ՀՀ Քննչական կոմիտեի մոտ ընթացող բողոքի ակցիայի ժամանակ հայտարարեց փաստաբան Ռոման Երիցյանը։

«Հարցին՝ ձերբակալվա՞ծ է այս պահին որևէ ոստիկան, կամ այս պահին այդ հարցը քննարկվու՞մ է, ՔԿ-ում պատասխանեցին՝ ոչ։ Քննչական կոմիտեն առաջարկում է ընդամենը կազմակերպել Տիգրան Ուլուբաբյանի լրացուցիչ հարցաքննություն, այն դեպքում, երբ ընդհանրապես դրա անհրաժեշտությունը չկա»,- նշեց փաստաբանը՝ ընդգծելով՝ հենց այսօր՝ թեկուզ ծառայողական քննության շրջանակում պետք է կասեցվի այն ոստիկանների պաշտոնավարումը, որոնք որևէ առնչություն ունեն Տիգրանի խոշտանգման հետ։