«Այն բանից հետո, երբ ինձ հեռացրեցիք կուսակցությունից, դուք ամենալավը չեք»․ Հովիկ Աղազարյանը՝ Սիսակ Գաբրիելյանին

««Մենք աշխարհի ամենալավ իշխանությունն ենք»․ ո՞վ է այս արտահայտության հեղինակը»,- դիմելով Հովիկ Աղազարյանին՝ հարցրեց ՔՊ-ական պատգամավոր Սիսակ Գաբրիելյանը։ Աղազարյանն ընդունեց, որ դա իր խոսքերն են՝ շարունակելով․ «Այն բանից հետո, երբ ինձ հեռացրեցիք կուսակցությունից, դուք ամենալավը չեք և շատ վատն եք»։ Սիսակ Գաբրիելյանը հիշեցրեց, որ Աղազարյանը մեկ այլ առիթով էլ ասել է, որ Նիկոլ Փաշինյանը պետք է հավերժ կառավարի։
Հիշեցնենք, որ Հովիկ Աղազարյանն իր ելույթում քիչ առաջ շեշտել էր, որ ամեն ինչ կանի, որպեսզի Նիկոլ Փաշինյանն այլևս չվերարտադրվի, քանի որ կդառնա ավտորիտար ղեկավար։

Հաջորդիվ «Հայաստան» խմբակցության պատգամավոր Գեղամ Մանուկյանը կատակեց․ «Տիկին դատախազ, Հովիկ Աղազարյանի հայտարարության համար, որ իրենք ամենալավ իշխանությունն են և Նիկոլ Փաշինյանը պետք է հավերժ ղեկավարի, մենակ այդ արտահայտության համար միջնորդեք՝ ցմահ ազատազրկվի»։