«ՀՅԴ-ն ոչ մեկին բացատրություն տալու անհրաժեշտություն չունի». Իշխան Սաղաթելյան

«Դաշնակցությունն էլ կողմ քվեարկեց, որ Նիկոլ Փաշինյանը եկավ իշխանության. այդ թեման Քոչարյանի և Սերժ Սարգսյանի թիմակիցներն են բացել»,- ճեպազրույցի ժամանակ լրագրողի այդ դիտարկմանը ԱԺ «Հայաստան» խմբակցության պատգամավոր Իշխան Սաղաթելյանը պատասխանեց, որ ինքը այդ թեմայով բազմիցս արտահայտվել է. «Ռոբերտ Քոչարյանը մեր գործընկերն է, գրեթե ամեն օր շփումներ եմ ունենում: Սերժ Սարգսյանի հետ անհրաժեշտության դեպքում հանդիպում ենք, քննարկում ենք, ես իմ բոլոր տեսակետները այդ հարցերի վերաբերյալ ասել եմ: Լրացուցիչ հրապարակային ասելիք չունեմ»:

«Ձեր ասածից տպավորություն էր, որ Դաշնակցությունը ոնց որ Քոչարյանին ներկայացրել է բացատրություն, թե ինչու է Նիկոլ Փաշինյանին կողմ քվեարկել»,- հնչեց նման տեսակետ, ինչին պատգամավորը արձագանքեց. «Դաշնակցությունը որևէ մեկին բացատրություն տալու անհրաժեշտություն չունի, որովհետև մենք մեր անելիքի համար բացատրություն ենք տալիս մեր շարքերին, մեր ընտրողներին: Ռոբերտ Քոչարյանի հետ մենք ձևավորել ենք դաշինք, շատ սերտորեն, փոխվստահության մթնոլորտում աշխատում ենք, որևէ խնդիր չունենք»: