«Քաղաքական ղեկավարությունը պատրաստվում է նոր զիջումների»․ Սարգիս Տեր-Եսայան

«Իրավունքի և արժեքների գերակայություն» ՀԿ նախագահ Սարգիս Տեր-Եսայանը ֆեյսբուքյան իր էջում գրել է. «Ապրիլյան պատերազմից 9 տարի անց. ի՞նչ ճանապարհ անցանք
2016 թվականի ապրիլյան պատերազմը պետք է լիներ լրջագույն ահազանգ Հայաստանի իշխանությունների և ամբողջ հայության համար։ Այդ օրերին մեր զինվորները հերոսաբար պաշտպանեցին Արցախը, բայց արդեն այն ժամանակ պարզ դարձավ, որ Ադրբեջանի պատերազմական ագրեսիան կանգ չի առնելու, եթե Հայաստանը չկազմակերպի իր պաշտպանական և դիվանագիտական համակարգը նոր որակով։
Պատերազմից հետո
✔ 2016-2018 – Պատերազմից հետո Հայաստանի իշխանությունները որոշ քայլեր ձեռնարկեցին բանակի ուժեղացման ուղղությամբ, սակայն դրանք կիսատ մնացին։ Հավանաբար, քաղաքական իրավիճակն ու ներքին փոփոխությունները թույլ չտվեցին այդ բարեփոխումներն ավարտին հասցնել։
✔ 2018-2020 – Թավշյա փոփոխությունից հետո նոր իշխանությունը հայտարարեց բանակի և անվտանգության համակարգի արդիականացման մասին, բայց իրականում ավելի շատ զբաղված էր քաղաքական հետապնդումներով, քան պաշտպանական ռազմավարության հստակ մշակմամբ։
✔ 2020-ի աղետը – 2020-ի 44-օրյա պատերազմը դարձավ Ապրիլյան պատերազմի տրամաբանական շարունակությունը, բայց այս անգամ՝ ոչ թե հաջող դիմադրության, այլ լիակատար պարտության տեսքով։ Պետությունը պատրաստ չէր, բանակը պառակտված էր, իսկ ռազմաքաղաքական ղեկավարությունն իր պարտականությունները չկատարեց։ Արդյունքում՝ մենք կորցրինք Արցախը, հազարավոր կյանքեր, և հայոց պատմության հերթական ծանր էջը գրվեց։
✔ 2020-2023 – Արցախը զիջելուց հետո Հայաստանի անվտանգային վիճակը ավելի է վատթարացել։ Ադրբեջանի ագրեսիան տեղափոխվել է Սյունիք ու Գեղարքունիք, իսկ հայկական կողմը ոչ միայն չի դիմակայում, այլև բացահայտ զիջումներ է անում՝ խոսելով ինչ-որ «խաղաղության դարաշրջանի» մասին։
✔ 2023-2025 – Արցախյան վերջին բնակիչների բռնի տեղահանությունից հետո Հայաստանի սահմաններն ամբողջությամբ բաց են Ադրբեջանի համար, իսկ քաղաքական ղեկավարությունը պատրաստվում է նոր զիջումների՝ ի հաշիվ Սյունիքի ու Հայաստանի ինքնիշխանության։
Եթե 2016-ին, չնայած ցավալի կորուստներին, մենք պահպանեցինք Արցախը և կարողացանք կանգնեցնել թշնամուն, ապա 9 տարի անց իշխանության վարած ապաշնորհ քաղաքականության պատճառով մեր կորուստները անհամեմատ մեծ են։ Պարտությունները շարունակվելու են, եթե չփոխենք այսօրվա իրավիճակը, չվերականգնենք ազգային ինքնագիտակցությունը և չվերադառնանք ուժեղ, ինքնիշխան պետություն կառուցելու ճանապարհին։
Ապրիլյան պատերազմի մեր հերոսները զոհվեցին հանուն Հայաստանի ապագայի, ու մենք պարտավոր ենք այդ ապագան կերտել՝ ոչ թե զիջումների, այլ պայքարի միջոցով»: