«ԱՄՆ-ն կարող է կրճատել Եվրոպայում իր զորակազմի թվաքանակը»․ Թրամփ

ԱՄՆ-ն կարող է կրճատել Եվրոպայում տեղակայված իր զորակազմի թվաքանակը, Սպիտակ տանը լրագրողներին հայտնել է ԱՄՆ նախագահ Դոնալդ Թրամփը։

«Դա կախված է իրավիճակից: Մենք վճարում ենք Եվրոպայում զինվորականների համար, սակայն մեծ փոխհատուցում չենք ստանում Եվրոպայից կամ Հարավային Կորեայից: Սա կլինի թեմաներից մեկը, որը մենք կքննարկենք: Առևտրի հետ դա կապված չէ, բայց, կարծում եմ, մենք այդ հարցը կընդգկենք առևտրի հարցերով բանակցությունների փաթեթում»։

ԱՄՆ պաշտպանության նախարար Փիթ Հեգսեթը չորեքշաբթի հայտնել էր, որ Միացյալ Նահանգները դեռ որոշում չի կայացրել Եվրոպայում իր ապագա ռազմական ներկայության մակարդակի վերաբերյալ։ Որոշումը կկայացվի Մոսկվայի հետ բանակցություններից հետո։

Ավելի վաղ NBC-ն, վկայակոչելով ամերիկացի եւ եվրոպացի պաշտոնյաներին, հայտնել էր, որ Փենթագոնը դիտարկում է Արևելյան Եվրոպայից մինչեւ 10 հազար զինվորական դուրս բերելու հնարավորությունը։ Ըստ աղբյուրի՝ դա 2022 թվականին ԱՄՆ նախկին վարչակազմի կողմից Ուկրաինային սահմանակից երկրներ ուղարկված 20 հազարանոց զորակազմի կեսն է։