«Հայաստանում կա խտրականություն և բռնություն կանանց նկատմամբ»․ Արարատ Միրզոյան

223

Չորեքշաբթի, 23 ապրիլի, 2025 թ., 13:00

«Վաղուց ժամանակն է, որ մենք պետք է շատ բարձրաձայն խոստովանենք՝ Հայաստանում կա խտրականություն կանանց նկատմամբ և, ավելին ասեմ, ՀՀ-ում կա բռնություն կանանց նկատմամբ, կա ընտանեկան բռնություն»,- Կառավարության նիստում «Գենդերային քաղաքականության իրականացման 2025-2028թթ․ ռազմավարությունը և միջոցառումների ծրագիրը հաստատելու մասին» հարցի քննարկման ժամանակ ասաց ԱԳ նախարար Արարատ Միրզոյանը։

«Սովորաբար ընդունված է ասել, որ դա կա մարզերում, բայց դա կա նաև Երևանում։ Սա այն դեպքերից է, որ սեղանների շուրջ ընդունված է ճոռոմ բառեր ասել և կենացներ խմել, օրինակ, այս դեպքում, կանանց մասին, բայց իրական կյանքում ճիշտ հակառակ վերաբերմունքը ցույց տալ կանանց նկատմամբ։ Մենք պետք է անողոք պայքար մղենք ընտանեկան բռնության դեմ և հստակ գործիքներ մշակենք»,- ասաց Միրզոյնը։

Վարչապետ Նիկոլ Փաշինյանը հավելեց, որ ֆիզիկական ներազդեցության բացակայությունը դեռևս չի նշանակում բռնության բացակայություն․ «Այն, որ կա բռնության միջավայր, ակնհայտ է։ Ընդհանուր առմամբ երկրում կա բռնության միջավայր»,- նշեց Փաշինյանը։