«ՀՀ-ից մատակարարումների սահմանափակումները կապված չեն քաղաքականության հետ»․ Դանկվերտ

«Ռոսսելխոզնադզորի» կողմից Հայաստանից որոշ պարենային ապրանքների մատակարարման սահմանափակումները պայմանավորված են ոչ թե քաղաքականությամբ, այլ հայտնաբերված խախտումներով։ Այս մասին «Российская газета»-ին տված հարցազրույցում հայտնել է գերատեսչության ղեկավար Սերգեյ Դանկվերտը։

Նրա խոսքով՝ Հայաստանի խնդիրը արտադրության և վերահսկողության կազմակերպումն է։ Մասնավորապես, Դանկվերտը նշել է, որ Հայաստանում գործում են մեծ թվով փոքր ֆերմերային տնտեսություններ, որոնք աճեցնում և արտահանման համար մատակարարում են իրենց արտադրանքը։ Դանկվերտը շեշտել է, որ արտադրանքի վերահսկողությունը պետք է տեղի ունենա անմիջապես արտադրության փուլում: Նա հավելել է, որ այդ թվում՝ համակարգի արդյունավետ աշխատանքի համար անհրաժեշտ է կոոպերացիա, արտադրական հսկողություն, ինչպես նաև արտադրողների միավորումների պատասխանատվություն: «Հենց դա է այսօր պակասում։ Հետևաբար, սահմանափակումների պատճառները կապված են արտադրանքի որակի և անվտանգության հետ, այլ ոչ թե քաղաքականության»,- եզրափակել է նա։