«Մեծարենք Ավետիք Իսահակյանին՝ առանց Երիտասարդության անունը մոռացության տալու»․ Սոնա Աղեկյան

«Մայր Հայաստան» դաշինքի անդամ Սոնա Աղեկյանի գրառումը. ««Երիտասարդական» կայարանը պետք է մնա որպես սերնդի, ակտիվության, նորության խորհրդանիշ։ Սա կայունության, հիշողության և զարգացման միջև եղած ճիշտ հավասարակշռությունն է։
Վերջերս շրջանառվում է Երևանի մետրոպոլիտենի «Երիտասարդական» կայարանը Ավետիք Իսահակյանի անունով վերանվանելու առաջարկ։ Թեպետ ազգային մեծերի անունները արժանի են արժևորման, սակայնայս դեպքում հարցը պահանջում է նուրբ մոտեցում և հստակություն՝ մանավանդ, երբ խոսքը վերաբերում է խորհրդանշական նշանակություն ունեցող կայարանի անունին։
«Երիտասարդականը»՝ խորհրդանիշ է ժամանակի, արժեքների և սերնդի, կայարանը չի կրում գաղափարական դատարկ անվանում․ այն կոչվում է մի ողջ սերնդի անվամբ և խորհրդանշում է երիտասարդության գաղափարը, որը վեր է անձնավորված պատմական հիշողությունից։
Սա այն եզակի մետրոպոլիտենյան կայարաններից է, որն ունի անհատականության փոխարեն սերնդային՝ շարունակական, ապագային միտված արժեք։
Անվանումը կրում է պատմություն, կայարանը բացվել է դեռևս խորհրդային շրջանում, և «Երիտասարդական» անվանումը նվիրված է եղել առաջադեմ, ակտիվ, կրթված սերնդին, որը պետք է կերտեր նոր Հայաստանի գաղափարը։ Դա պատահական ընտրություն չէր, այլ գիտակցված հասարակական ուղերձ։
Ավետիք Իսահակյանի մեծությունը անվանակոչման կարիք չունի։
Ավետիք Իսահակյանը ազգային հսկա է՝ բանաստեղծ, մտածող, գաղափարական և հայրենասեր դեմք։ Նա արդեն պատշաճ կերպով ներկայացված է մեր հասարակական տարածքում։
Նրա անունը կրում են դպրոցներ, գրադարաններ, հրապարակ, արձաններ։ Իր ավանդն արդեն ճանաչված է համաշխարհային մակարդակով։
Անվանափոխությունները խաթարում են պատմական շարունակականությունը։
Մետրոպոլիտենի կայարանների անունները իրենցից ներկայացնում են քաղաքային հուշապատկեր և նրանց անվանափոխությունները կորցնում են հիշողությունը, խզում են սերունդների միջև եղած կապը։
«Երիտասարդական» անվանափոխումը ստեղծում է անհարկի մրցակցություն արժեքների միջև՝ երիտասարդություն. ազգային գրականություն։ Սա արհեստական խնդիր է, որը միայն սոցիալական անհանգստություն է ստեղծելու։
Ազգային մեծերի անունները մեծարելու լավագույն ձևը նրանց գործերի տարածումն է, ոչ թե արդեն արմատացած հանրային անունների վերաձևումը։ «Երիտասարդական» կայարանը պետք է մնա որպես սերնդի, ակտիվության, նորության խորհրդանիշ։ Սա կայունության, հիշողության և զարգացման միջև եղած ճիշտ հավասարակշռությունն է։
Եկեք մեծարենք Ավետիք Իսահակյանին՝ առանց Երիտասարդության անունը մոռացության տալու»։