Արտուշ Գաբրիելյանին մեղադրանք կներկայացվի

Երևանի ընդհանուր իրավասության քրեական դատարանի դատավոր Արտուշ Գաբրիելյանին մեղադրանք կներկայացվի։ Բարձրագույն դատական խորհուրդը քիչ առաջ հրապարակել է որոշումը, որով բավարարել է Գաբրիելյանի նկատմամբ հետապնդում հարուցելու համաձայնություն տալու վերաբերյալ գլխավոր դատախազի միջնորդությունը։ Այս մասին գրում է «Փաստինֆո»-ն՝ հավելելով, որ հաջորդիվ ԲԴԽ-ն քննելու է Գաբրիելյանին կալանավորելու համաձայնության վերաբերյալ դատախազի միջնորդությունը։

Նշենք, որ քրեական գործը վերաբերում է կաշառք ստանալուն։ Քրեական գործի համաձայն՝ դատավորը կաշառք է պահանջել և ստացել՝ հօգուտ մեղադրյալի դատավարությունը ձգձգելու և հետագայում վաղեմության ժամկետներն անցած լինելու հիմքով կարճելու համար։ Գործով արդեն երկու անձ կալանավորվել է, այդ թվում՝ դատավորի օգնականը, որը մեղադրվում է օժանդակության մեջ։