«Հոկտեմբերի 27-ի թեման օր առաջ փակվելու հեռանկար տվեք»․ Անդրանիկ Քոչարյանը՝ Աննա Վարդապետյանին

«Հոկտեմբերի 27-ի գործը պետք է 28-ին բացահատված լիներ, և այդ որդը չպետք է մեզ ամեն տարի հոշոտեր, իրար մեջ թշնամիներ չպետք է ման գայինք»,- ԱԺ-ում իր ելույթի ժամանակ ասաց Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ Խոսքն ուղղելով ՀՀ Գլխավոր դատախազ Աննա Վարդապետյանին՝ նա թվարկեց հոկտեմբերի 27-ի գործով մի քանի փաստեր, ապա ասաց․ «Էս հարցերն այնքան շատ պարարտ հող են տալիս բացահայտման համար»։ Անդրանիկ Քոչարյանը բողոքեց, որ հոկտեմբերի 27-ի գործը դեռ ավարտված չէ և գլխավոր դատախազը դեռ նախաքննության մասին է խոսում։
Նշենք, որ ավելի վաղ դատախազն իր խոսքում նշել էր, որ Հոկտեմբերի 27-ի գործը գտնվում է ակտիվ նախաքննության փուլում․ «Գործը պատշաճ դատախազական հսկողության ներքո է։ Չեմ պատասխանի ոչ մի բովանդակային հարցի, որպեսզի չվնասեմ քննությանը։ Մենք, ելնելով նախաքննության շահից, կիսատ տեղեկատվություն չենք հրապարակի, որովհետև հրապարակված կիսատ տեղեկատվությունը թույլ է տալիս հասկանալ, թե հնարավոր ինչ զարգացում կարող է ունենալ, ու անձինք ուղղակի անհետանում են Հայաստանից։ Մենք չենք կարողանում այդ անձանց նկատմամբ հետպանդում իրականացնել։ Դրա համար նմանատիպ քննարկումները վնասում են»,- ասել էր դատախազը՝ նշելով, որ նույնն էլ վերաբերում է Մարտի 1-ի գործին։
«Ես բավարարված չեմ, որևէ բառ չխոսեցիք հոկտեմբերի 27-ի մասին։ Մեզ էիք խնայո՞ւմ։ Հոկտեմբերի 27-ի թեման օր առաջ փակվելու հեռանկար տվեք մեզ։ Իրական բացահայտում է պետք։ Կարևոր վկաներ դեռ կան»,- խոսքն ուղղելով գլխավոր դատախազին՝ ասաց Անդրանիկ Քոչարյանը։