«Ահավոր վատ է, որ դուք ևս բռնեցիք այդ դատապարտելի ուղին»․ Հայր Ասողիկ Կարապետյան

Մայր աթոռ Սուրբ Էջմիածնի Թանգարանների և արխիվի տնօրեն Հայր Ասողիկ Կարապետյանի ֆեյսբուքյան գրառումը․ «Հարգարժա՛ն Տիար Արայիկ Հարությունյան,
Սրտի ցավով կարդացի Ձեր գրառումը: Առհասարակ չեմ արձագանքում որևէ նման գրվածքների, բայց, որովհետև անձնապես ճանաչում եմ Ձեզ, միասին մի պատվական Խորհրդի մաս ենք կազմում, ավելին՝ անկեղծ հարգանք ունեմ Ձեր անձի նկատմամբ, ուստի հարկ համարեցի արձագանքել Ձեր գրառմանը:
Սուրբ Եկեղեցում առհավետ միմիայն ՃՇՄԱՐՏՈՒԹՅՈՒՆՆ Է: Եվ մենք՝ բազմամեղ հոգևորականներս, միմիայն ՃՇՄԱՐՏՈՒԹՅԱՆ կրողներ ենք և քարոզողներ: Եվ մենք, հոգևորականներս, մեր Ճեմարանական բարձրագույն կրթությամբ և Ավետարանական բարոյագիտությամբ՝ գիտենք պատվել և արժանին մատուցել պետական պաշտոնյային՝ մեր հարազատ Երկրի իշխանավորին (որքան էլ լինենք դժգոհ, տարակարծիք): Եվ ա՛յս ենք տեսել ու սովորել մեր բոլոր Հայրապետներից, մանավանդ, ներկայիս Ն.Ս.Օ.Տ.Տ. Գարեգին Բ. Ամենայն Հայոց Վեհափառ Հայրապետից, ով իմ հոգևոր Հայրն է, իմ Ուսուցիչը, իմ Հովվապետը:
Մեծ ցավ է, իրապես, որ Դուք՝ լինելով կրթված անձ, պետական այր, Ձեզ թույլ եք տալիս նման անհեթեթ խոսքեր, այդպես անբարեկիրթ վերաբերմունք Ամենայն Հայոց Հայրապետի հանդեպ: Վատ է, ահավոր վատ է, որ Դուք ևս բռնեցիք այդ դատապարտելի ուղին…
Մնում եմ սիրով աղոթարար, հուսալով, որ ի վերջո Ձեր և Ձեր գաղափարակիցների հոգում կծագի ՃՇՄԱՐՏՈՒԹՅԱՆ և ԱՐԴԱՐՈՒԹՅԱՆ ԼՈՒՅՍԸ՝ տեսնելու և գիտակցելու այն աղետը, որը հունցվում է մեր Երկրում: Մինչդեռ մենք միասին կարող էինք կանգնեցնել այս աղետը: Տակավին ի զորու ենք, ԵՂԻՑԻ ԿԱՄՔ:
Հարգանոք և աղոթքով՝
Ասողիկ աբեղա Կարապետյան
Մայր Աթոռ Սուրբ Էջմիածնի միաբան
Մաշտոցյան Մատենադարանի
Հոգաբարձուների խորհրդի անդամ»։