ԵՀԽ-ն մտահոգություն է հայտնել Հայ առաքելական եկեղեցու հետ կապված վերջին զարգացումների կապակցությամբ

Եկեղեցիների համաշխարհային խորհրդի գլխավոր քարտուղար, պրոֆեսոր, դոկտոր Ջերի Փիլլեյը խորը մտահոգություն է հայտնել Հայաստանում Հայ առաքելական եկեղեցու հետ կապված վերջին զարգացումների, այդ թվում՝ Մայր Աթոռ Սուրբ Էջմիածնում իրավապահ մարմինների կողմից ձեռնարկված գործողությունների և բարձրաստիճան հոգևորականների ձերբակալման հետ կապված, ասված է ԵՀԽ էջում տարածված հայտարարության մեջ։

«Հայ առաքելական եկեղեցին ունի յուրահատուկ և հարգված տեղ հայ ժողովրդի հոգևոր, մշակութային և պատմական կյանքում»,- ասել է Փիլլեյը։

«Նվիրական վայրերում ուժի կիրառման և հոգևորականների ձերբակալման մասին հաղորդագրությունները լուրջ մտահոգություններ են առաջացնում կրոնի ազատության, պաշտամունքի սրբության և կրոնական հաստատությունների ինքնավարության պաշտպանության վերաբերյալ։ Կրոնական համայնքների նկատմամբ թշնամական կամ որպես արհամարհական ընկալվող լեզուն սպառնում է հասարակության ներսում բաժանումների խորացմամբ՝ այն ժամանակ, երբ միասնությունն ու փոխըմբռնումն ամենաշատն են անհրաժեշտ»,- ասել է նա։

Փիլլեյը ՀՀ կառավարությանը կոչ է արել ապահովել բոլոր կրոնական առաջնորդների և հաստատությունների պաշտպանությունը, արժանապատվությունը և օրինական իրավունքները, զերծ մնալ այնպիսի գործողություններից կամ հայտարարություններից, որոնք կարող են մեկնաբանվել որպես կրոնական մարմիններին ուղղված կամ հանրային թշնամանք հրահրող։

«ԵՀԽ-ն համերաշխություն է հայտնում Հայ Առաքելական Եկեղեցուն, որի պատմական վկայությունն ու անսասան դերը վաղուց նպաստել են հայ ազգի և համաշխարհային քրիստոնեական միասնության հոգևոր կյանքին և դիմադրողականությանը»,- ասել է Փիլլեյը։