«Ահազանգ. Վերին Դվինում առավոտից անօրինական ձերբակալություններ են»․ Զեմֆիրա Միրզոևա

ԱԺ «Հայաստան» խմբակցության պատգամավոր Զեմֆիրա Միրզոևան ֆեյսբուքյան էջում տեսանյութեր է հրապարակել՝ գրելով․ «Հրատապ ահազանգ։ Հրավիրում եմ պատկան մարմինների և լրատվամիջոցների ուշադրությունը։
Ինձ են դիմել Արարատի մարզի Վ. Դվին համայնքի բնակիչներն՝ ահազանգելով, որ այսօր վաղ առավոտյան ՀՀ ոստիկանության Արտաշատի բաժնի ոստիկանները ներխուժել են համայնք և անօրինական ձերբակալություններ են իրականացնում։ Բնակիչների խոսքով՝ իրավապահները թույլ չեն տալիս մարդկանց իրենց առօրյա գյուղատնտեսական աշխատանքները կատարել և բացահայտ հայտարարում են՝ «Տեռոր ենք անում, ահաբեկում ենք, լավ ենք անում, շուտով հատուկ ջոկատաիններ էլ կկանչենք»։
Ըստ ահազանգի՝ ձերբակալում են թե՛ տղամարդկանց, և թե՛ կանանց»։

Yerevan.Today-ին Արարատի մարզի Վերին Դվինի համայնքի բնակիչներից մեկը պատմել է, որ օրերս վեճ է եղել Դեղձուտ և Վերին Դվին գյուղերի մի քանի բնակչի, այդ թվում՝ Դեղձուտի գյուղապետի միջև։ Վեճը եղել է մթերած ծիրանի գումարը ժամանակին չտրամադրելու վերաբերյալ։ Ըստ երևույթին, վեճը վերածվել է ծեծկռտուքի։ Դրանից հետո ոստիկանությունը ներխուժում է Վերին Դվին ու սկսում բերման ենթարկել մարդկանց՝ անկախ տարիքից, սեռից և նրանից՝ վեճի հետ առնչություն ունի, թե չէ։

Լրատվականի հաղորդմամբ՝ ոստիկանները Դեղձուտ համայնք չեն մտել, այլ միայն Վերին Դվին։