«Քաղաքացու հաշիվներից գումարներ են անհետացել»․ Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը. «Քեզ խաբեցին, հետո պարտավորեցրին վերադարձնել գումա՞րը։ Սա քեզ է վերաբերում։
Սա իրական պատմություն է, որը կարող է պատահել յուրաքանչյուրի հետ։
Քաղաքացին հայտնաբերել է, որ իր բանկային հաշիվներից անհետացել են գումարներ։
Երբ դիմել է բանկ՝ պարզաբանում ստանալու համար, բանկը մերժել է գումարի վերադարձը՝ պնդելով, թե հենց քաղաքացին է մեղավոր, քանի որ տրամադրել է իր անձնական տվյալները 3-րդ անձանց։
Քաղաքացին հակադարձել է՝ նշելով, որ իրեն պարզապես խաբել են, նա հայտնվել է ծուղակում, և երբևէ չի հասկացել, որ ինչ-որ տվյալ տրամադրելով՝ կարող է թույլ տալ իր հաշիվներից գումար փոխանցել։
Վերջում, իբրև հարցի «լուծում», բանկը առաջարկում է վերադարձրել է գումարը, բայց ոչ որպես արդարացում, այլ՝ քաղաքացուն առաջարկելով ստորագրել փոխառության պայմանագիր, որի կարևոր կետերից մեկը հետևյալն է՝
«Եթե քրեական վարույթով դատարանը ճանաչի քաղաքացուն մեղավոր, ապա նա պարտավոր է 5 օրվա ընթացքում վերադարձնել այդ գումարը»։
Բայց արդյո՞ք այս պայմանագիրը նշանակում է, որ քաղաքացին իսկապես մեղավոր է։
Ո՛Չ։
ԻՐԱՎԱԿԱՆ ՊԱՐԶԱԲԱՆՈՒՄ
Քաղաքացու մեղավորությունը կարող է որոշել միայն դատարանը, ոչ թե որևէ պայմանագիր։
Եթե դատարանը գտնի, որ քաղաքացու գործողությունները չեն եղել դիտավորությամբ, կամ չարամտորեն այլ եղել են միամտություն կամ խաբեության զոհ լինելու արդյունք, ապա նա չի կարող համարվել մեղավոր։
Այս դեպքում՝ այդ պայմանագրի կետը ուժի մեջ չի մտնի, և քաղաքացուն չի կարող պարտադրվել վերադարձնել գումարը։
Պայմանագրի այս դրույթը ուժի մեջ է մտնում միայն այն դեպքում, երբ կա օրինական ուժի մեջ մտած մեղադրական դատավճիռ։
Հետևաբար՝ քաղաքացիներ ջան, մի՛ վախեցեք։
Եթե դուք դարձել եք խաբեության կամ կիբեռհանցագործության զոհ, մի ընդունեք պարտավորություններ, որոնք բխում են ոչ թե ձեր մեղքից, այլ ուրիշի հանցանքից»։