«Չեմ կասկածում՝ Սահմանադրության փոփոխության դեպքում ՀՀ-ն կբացառի տարածքային պահանջները»․ Ալիև

«Չեմ կասկածում, որ Հայաստանի Սահմանադրության փոփոխության դեպքում, իսկ հայկական կողմը ինքն է հայտարարում է նման փոփոխությունների անհրաժեշտության մասին, Ադրբեջանի նկատմամբ տարածքային հավակնություններն այնտեղից կբացառվեն»,- Վաշինգթոնում լրագրողներին ասել է Ադրբեջանի նախագահ Իլհամ Ալիևը։ «Հակառակ դեպքում, սա, առաջին հերթին, Ամերիկայի Միացյալ Նահանգների նկատմամբ անհարգալից վերաբերմունքի դրսևորում կլինի։ Որովհետև բոլորը գիտեն, և մեր դիրքորոշումը հասկանում են գրեթե բոլոր առաջատար միջազգային դերակատարները, այդ թվում՝ Ամերիկայի Միացյալ Նահանգները։ Որովհետև երբ խաղաղության համաձայնագիր է ստորագրվում, բոլոր հարցերը պետք է լուծվեն, և մեր նկատմամբ անհիմն տարածքային պահանջները պետք է բացառվեն դրանից։ Հետևաբար, ես կասկածներ չունեմ այս հարցում», - ընդգծել է Իլհամ Ալիևը։