Սերբիայում ցուցարարների և ոստիկանության միջև բախումները շարունակվում են

Սերբիայում երկրի նախագահ Ալեքսանդր Վուչիչի կողմնակիցների և նրա հակառակորդների միջև բախումները շարունակվում են արդեն երրորդ օրը։ Օգոստոսի 16-ին, շաբաթ օրը, ցուցարարների և ոստիկանության միջև բախումների ժամանակ դիմակներով և շարֆերով երիտասարդների մի խումբ ջահեր է նետել Սերբիայի առաջադեմ կուսակցության գրասենյակի վրա Վալևո քաղաքում, որը գտնվում է մայրաքաղաք Բելգրադից մոտ 100 կմ հարավ-արևմուտք։ Իրավապահ մարմինները արցունքաբեր գազ են կիրառել և հարձակվել ցուցարարների վրա, որոնք, հակակառավարական կարգախոսներ վանկարկելով, շշեր, քարեր և ճայթռուկներ են նետել նրանց վրա։ Նմանատիպ բախումներ են տեղի ունեցել նաև Բելգրադում, որտեղ ոստիկանությունը արցունքաբեր գազ է կիրառել աղբամաններ հրկիզած ցուցարարների դեմ։ Վալևոյում վիրավորվել է առնվազն մեկ ոստիկան, ձերբակալվել է 18 մարդ, հայտնել է Ներքին գործերի նախարար Իվիցա Դաչիչը։ Հրապարակման պահին Բելգրադում զոհերի կամ ձերբակալվածների մասին տեղեկություններ չկան։