«Արևմուտքը կանաչ լույս է տվել Նիկոլ Փաշինյանի ռեժիմին՝ հակաօրինական գործողություններ անելու»․ Էդուարդ Շարմազանով

«Շատ բարդ է տրամաբանություն և արդարադատություն փնտրել այս իշխանությունների գործողությունների մեջ»,- այս մասին Հակակոռուպցիոն դատարանի բակում լրագրողների հետ զրույցում նշեց ՀՀԿ փոխնախագահ Էդուարդ Շարմազանովը։

Նրա դիտարկմամբ՝ այս իշխանությունների արդարադատության և ժողովրդավարության արժեքների վերաբերյալ խոսելն անիմաստ է, որովհետև որքան իրենք խոսեն ժողովրդավարության բաստիոն լինելու մասին, այնուամենայնիվ, տասնյակ քաղաքական բանտարկյալների առկայությունը խոսում է մի կարևոր փաստի մասին․ «Հայաստանը միլիոնավոր կիլոմետրերով հեռու է ժողովրդավարությունից և հստակ քայլերով գնում է դեպի քաոս, հակօրինական ռեժիմ»։

Անդրադառնալով հարցին, թե ինչու միջազգային կառույցների կողմից համարժեք արձագանք չի հնչում՝ տեղի ունեցող գործընթացների վերաբերյալ, Շարմազանովը պատասխանեց․ «Համոզված եմ, որ եթե նույնիսկ այստեղ ինձ ճակատից գյուլեն, Արևմուտքը ոչ մի բան չի անի։ Արևմուտքի նպատակն է այս իշխանություններին քաջալերելը, այս իշխանություններին պատվեր տալը և երրորդ հանրապետության ոչ միայն ազգային, այլ նաև ժողովրդավարական ինստիտուտների իսպառ քանդումը․․․Արևմուտքը կանաչ լույս է տվել Նիկոլ Փաշինյանի ռեժիմին՝ հակաօրինական գործողություններ անելու․․․ Մենք ապրում ենք քաոսային իրավիճակում։ Բոլոր մարդիկ նստած են՝ ոչինչ չանելու համար»։