«Տարիներ շարունակ ի՞նչն է ֆինանսավորվել և խրախուսվել Հայաստանում». Հակոբ Բադալյան

Քաղաքական մեկնաբան Հակոբ Բադալյանի գրառումը․ «Հաճախ կարող ենք լսել հարցը, թե՝ լավ, հանրությունը ինչպես հասավ այս վիճակին, ինչպե՞ս հնարավոր եղավ «մարսել» տալ այն, ինչ կատարվում է, եւ այլն, եւ այլն:
Եկեք տանք մի պարզ հարց. տարիներ շարունակ ի՞նչն է ֆինանսավորվել եւ խրախուսվել Հայաստանում: Մի՞տքը, սկզբու՞նքը, գաղափա՞րը, բովանդակությու՞նը:
Ոչ, ավելի քան երկու տասնամյակ ֆինանսավորվել է երեսպաշտությունը, անարժանապատիվ քծնանքը, կռապաշտությունը, ցինիզմը, պատեհապաշտությունը, բամբասանքը, «մուտիլովկաները»:
Հայաստանյան խոշոր կապիտալն ու քաղաքական իշխանությունը՝ ձեռք ձեռքի տված, կամ թեկուզ միմյանց ինադու, գուցե ընդամենը եզակի՝ շատ եզակի բացառություններով, այս երեւույթներից զատ, ուրիշ բան ֆինանսավորե՞լ են:
Իսկ ի՞նչը պետք է լիներ այդ «ուրիշ բանի» խրախուսման բացակայության հետեւանքը, քան այն, ինչ եղավ: Ի՞նչ հանրային մտածողություն ու միջավայր պետք է ձեւավորվեր, եւ այդ միջավայրն ի՞նչ պետք է ծներ ու սներ, քան իր պատկերն ու նմանությունն ունեցողների նոր սերունդ: Եվ այդ հատկանիշներով՝ ավելի համարձակ ու անկաշկանդ սերունդ:
Նկատի ունեմ՝ ավելի համարձակ ու անկաշկանդ ոչ թե պետականապաշտության, այլ՝ ցինիզմի, պատեհապաշտության, երեսպաշտության հարցում:
Սա անցած գնացած հարց չէ: Սա հարց է, որի պատասխանին առերեսվելու համարձակությունն ու խոհեմությունն է, որ դառնալու է իրականության հիմնարար փոփոխության բանալի»։